Сингапурын найруулагч Нельсон Ёогийн шинэ бүтээл “The House on the Moon” киноны хэсгээс олон нийтэд цацаж толилууллаа. Энэхүү кино нь Сингапурын кино урлагийн түүхэн дэх анхны wuxia буюу уся (Хятадын тулаант, баатарлаг уран зөгнөлт) бүрэн хэмжээний кино гэдгээрээ онцлог юм.
Найруулагч Нельсон Ёо “Variety”-д өгсөн ярилцлагадаа өмнөх бүтээлүүдтэй харьцуулахад энэ удаад жанрын хязгаарыг барихын оронд түүнийг бүрэн дүүрэн хүлээн авч, уся киноны хэв маягийг зоригтойгоор ашиглахаар шийдсэн гэжээ. Түүний хэлснээр энэ нь бага насны мөрөөдлөө кино хэлээр биелүүлэх боломж болсон байна.
“The House on the Moon” кино нь Хятадын домог болох Сарны дагина Чан Э болон мэргэн харваач Хоу Игийн түүхийг орчин үеийн шинжлэх ухааны уран зөгнөлтэй хослуулан шинэ өнцгөөс өгүүлсэн бөгөөд Сингапурт виртуал продакшн технологиор бүтээгдсэн анхны бүрэн хэмжээний кино гэдгээрээ онцгой ач холбогдолтой.
Киноны гол дүрд Сингапурын жүжигчин Лим Шиан тоглосон бол Тайванийн нэрт жүжигчин Ли Каншэн, мөн Акира Хуан, Доминик Рустам зэрэг олон улсын жүжигчид хамтран ажиллажээ.
“The House on the Moon” кино ирэх наймдугаар сард Швейцарт болох 79 дэх удаагийн Локарногийн олон улсын кино наадамд дэлхийн нээлтээ хийж, наадмын хамгийн нэр хүндтэй шагнал болох “Алтан Ирвэс” (Golden Leopard)-ийн төлөө өрсөлдөнө.
