Г.Занабазарын нэрэмжит Дүрслэх урлагийн музейн 60 жилийн ойн хүрээнд, тус музейн сан хөмрөгт буй үнэт өвийг олон нийтэд толилуулах “Дүрслэх урлагийн оюуны өв сан” тусгай үзэсгэлэнг дэлгэж байна.
Уг үзэсгэлэнд музейн сан хөмрөгийн ховор нандин цуглуулга, сор бүтээлүүдийг дэлгэх бөгөөд Монголын дүрслэх урлагийн хөгжлийн түүхэн замнал, залгамж холбоо, уран бүтээлийн үзэл санаа, хэв маягийн хувьсал, уран сайхны өвөрмөц онцлог, өв уламжлалыг сурталчлан таниулахыг зорьж буй.
Тус үзэсгэлэнд онцлог цуглуулга бүхий 200 гаруй үзмэр, эд зүйлсийг толилуулж байна.
Г.Занабазарын нэрэмжит Дүрслэх урлагийн музей нь Монголын дүрслэх урлагийн түүх, соёлын өвөрмөц үзмэр цуглуулга, сан хөмрөгтэй. Тиймээс энэхүү тусгай үзэсгэлэнд музейн 60 жилийн хугацаанд бүрдүүлсэн үнэт цуглуулгын онцлох бүтээлүүдийг дээжлэн үзүүлэхээс гадна Монголын дүрслэх урлагийн оюуны өвийн үнэ цэн, өвлөн уламжлуулах ач холбогдол, үнэ цэнийг харуулахыг эрхэмлэж буй ажээ.
