“Spider-Man” киноны жүжигчин Тоби Магуайр экс эхнэр Женнифер Мейерийнхээ хуримын ёслолыг удирдан явуулж, түүнийг шинэ нөхөр Жеффри Огунлеситэй гэрлэхэд нь хамт байсан нь олны анхаарлыг татлаа.
Үнэт эдлэлийн дизайнер, “Jennifer Meyer Jewelry” брэндийн үүсгэн байгуулагч Женнифер Мейер аравдугаар сарын 10-нд Нигерийн тэрбумтан Адебайо Огунлесигийн хүү Жеффри Огунлеситэй гэрлэжээ. Хуримын ёслол Хавайн Ланай арал дахь “Four Seasons” амралтын газарт болсон байна.
Хуримд жүжигчин Леонардо Ди Каприо найз бүсгүй Витториа Череттитэйгээ, Amazon компанийг үүсгэн байгуулагч Жефф Безос эхнэр Лорен Санчес Безостойгоо оролцсон аж.
Тоби Магуайр, Женнифер Мейер нар 2007 онд гэрлэж, хоёр хүүхэдтэй болсон ч 2016 онд тусдаа амьдрах болсноо зарласан юм. Хожим нь тэд гэрлэлтээ албан ёсоор цуцлуулжээ.
Хэдийгээр гэр бүлээ цуцлуулсан ч Магуайр экс эхнэрийнхээ хуримд оролцож, ёслолыг удирдсан нь тэдний харилцаа болон гэр бүлийн холбооны талаар олон нийтийн анхаарлыг дахин татсан байна.
