АНУ-ын Флорида мужийн Майами-Дэйд тойрогт амьдардаг, Монгол гаралтай, жүжигчин, загвар өмсөгч Саруултуяагийн Хүслэн “Uber Eats”-ийн хоол хүргэлтийн жолоочийг буудаж хөнөөхийг завдсан хэргээр баривчлагджээ. Мөн түүний гэрт нэгжлэг хийх үеэр олон төрлийн мансууруулах болон сэтгэцэд нөлөөлөх бодис, 11 мянга гаруй ам.долларын бэлэн мөнгө илэрсэн талаар тус улсын хэвлэлүүд мэдээлэв.
Цагдаагийнхны мэдээлснээр, хэрэг аравдугаар сарын 12-ны үүрээр гарсан байна. “Uber Eats”-ийн жолооч хоол хүргэх үеэрээ нэгэн эмэгтэйтэй ярилцсан бөгөөд дараа нь түүнтэй дахин уулзаж, утасны дугаарыг нь авах зорилгоор тухайн газарт эргэн иржээ. Энэ үеэр эмэгтэйн найз залуу гэх 33 настай С.Хүслэн жолооч руу буу тулган газарт хэвтэхийг шаардсан байна.
Улмаар жолооч руу буудахад сум өгзөгний баруун хэсгийг шүргэжээ. Мөн гар бууныхаа бөгсөөр толгойн ар хэсэгт нь цохиж, заналхийлсэн хэмээн цагдаагийн тайланд дурдсан байна. Хохирогч зугтаж, эмнэлгийн тусламж авчээ. Цагдаагийнхан С.Хүслэнг баривчилж, гэрт нь нэгжлэг хийх үеэр кокаин, MDMA, кетамин, марихуан, псилоцибин агуулсан мөөг болон жороор олгодог эмүүд илрүүлсэн аж. Түүнчлэн мансууруулах бодисыг хэмжиж, савлахад ашиглаж байсан байж болзошгүй өрөө олджээ.
С.Хүслэнг хүний амь хөнөөхийг завдсан, аюултай зэвсэг ашигласан болон мансууруулах бодистой холбоотой хэд хэдэн хэрэгт буруутгаж байгаа аж. Шүүх түүнийг барьцаагаар суллах хүсэлтийг зөвшөөрөөгүй тул цагдан хоригдож байна.
Тэрбээр Дархан-Уул аймагт төрсөн бөгөөд найман настайдаа АНУ-д хөл тавьжээ. Улмаар тус улсад загварын салбарт амжилттай ажиллаж байсан юм. Мөн тэрбээр 2020 онд үзэгчдэд хүрсэн “U” фильмийн бүтээл ““Single Ladies-4: Төгсгөл ба эхлэл” уран сайхны киноны гол дүрд тоглож байв.
