Монгол Улсын Хүүхэлдэйн театрын бүтээл “Миний хөөрхөн шүдний аялал” хүүхэлдэйн жүжгийг бяцхан үзэгчдэд аймгийн Тэмүжин театрт толилуулж эхэллээ.
Энэхүү жүжиг нь хүүхдүүдэд шүд, амны хөндийн эрүүл мэндийн талаарх мэдлэг боловсрол олгох, шүдээ зөв тогтмол угаах дадлыг төлөвшүүлэх, амны хөндийн эрүүл мэндийн тусламж үйлчилгээ авах үед үүсдэг айдсыг арилгах, шүдний өвчлөл үүсгэгч эрсдэлт хүчин зүйлсийн хэрэглээг бууруулах, сөрөг үр дагавруудын талаарх ойлголтыг бий болгох, амны хөндийн өвчлөлөөс урьдчилан сэргийлж шүдээ зөв тогтмол угааж хэвшихийн ач холбогдлыг сурталчлах зэрэг олон чухал ач холбогдолтой уран бүтээл юм.
Шүдээ угаах дургүй, чихэр, ундаанд дуртай 5 настай Моонон хүүгийн зүүдэнд нэгэн удаа Мөнгөн өвгөн айлчлан ирж, шүдээ угаахын ач тусыг үлгэрээр дамжуулан ойлгуулна. Хүүгийн зүүдэнд түүний шүднүүдийн адал явдал өрнөдөг. Чихэр ундаанд дуртай Араахай өөрийн зөрүүд, хайнга зангаасаа болж шүдний хорхойнуудтай нөхөрлөн баларч байгаа тухай гарна. Моонон хүү шүдээ угаагаагүйгээс болж шүд нь цоорч бие нь өвдөнө. Тэрээр мөнгөн дагина, цагаан нөмрөгт баатруудын тусламжтайгаар шүдний хорхойноос салж байгаа тухай энэхүү жүжигт өгүүлнэ. Жүжигт хөөрхөн шүднүүдийн нөхөрлөл, Оолой, Сойзмаа, Арзаахай, Мөнгөн дагина, Мөнгөн өвгөн зэрэг өөр өөрийн онцлог дүрүүд гардаг.
Хүүхэлдэйн жүжиг энэ сарын 6-ны өдрийг дуустал өдөр бүр 10:00, 11:30 цагаас тоглогдох бөгөөд хөгжилтэй адал явдал, эрүүл шүдний зөв дадал, инээд хөөр, ухаарал дүүрэн мөчүүдийг тус жүжгээс мэдрэх боломжтой.
Ташрамд мэдээлэхэд, Тус жүжгийг тайзнаа тавьж буй Баянхонгор аймгийн Тэмүжин театр нь 1986 онд байгуулагдсан Монголын анхны хүүхдийн театр юм. 40 жилийн түүхтэй тус театр 30 гаруй ажилтан, дөрвөн албатай, сургалт, уран бүтээл гэсэн үндсэн хоёр чиглэлээр үйл ажиллагаагаа явуулж байна. Театрынхан жилийн турш хүүхэд багачуудад зориулсан хуваарьт 12 тайлан тоглолтыг тавьдаг бөгөөд бүжиг, драм, үндэсний хөгжим зэрэг дугуйлан хичээллүүлдэг.
