Чамайг хамгийн их дээрэлхэж дарладаг зүйл бол чи өөрөө гэсэн сургаал байдаг. Чи тэнэг, чи ухаангүй, чи бүтэлгүй, чи дорой, чи ядуу, чи хэзээ ч баяжиж, албан тушаал ахиж чадахгүй, дээрэлхүүлж байхдаа таарсан амьтан мөн, хэзээ чиний ажил чинь бүтэлтэй байлаа гэх зэрэг үгнүүдийг санаж байна уу.
Энэ үгийг танд хөндлөнгийн хүн барагтай л бол хэлэхгүй. Хэлсэн ч та түүнийг хэлүүлээд байна гэж үү. Заавал ч үгүй хариуг нь барьж таарна. Ил цагаан чаддаггүй юм бол нууцаар ч гэсэн тэр хүнийг чадахыг боддог.
Харин дээрх доромж үгийг та өдөр болгон өөртөө хэлж байдаг. Бүүр ингэж хэлэх нь аятайхан ч юм шиг санагдах нь бий. Өөрөө өөрийгөө өрөвдөөд хэнгэнэтэл санаа алдан нүдэндээ нулимс цийлэгнүүлдэг муу зан хүнд байдаг. Үүнээс үүдэн чамайг хамгийн их доромжилдог зүйл бол чи өөрөө гэж хэлээд байгаа юм.
Энэ тэгээд муу юу гэж үү. Зүгээр л нэг жишээ татъя л даа. Хүндийн өргөлтийн тамирчин төмөр өргөхөөсөө өмнө төвлөрөөд л нэг хэсэг нам гүм болчихож байгаа нь харагддаг. Тэд би энэ төмрийг өргөж чадна гэж өөртөө итгүүлж байгаа нь тэр юм. Тамирчин төвлөрч гүйцлээ. Тэр нөгөө хүнд төмрийг өргөж чадна гэдэгтээ итгэлтэй болжээ. Тамирчин төмрөө өвс шүүрч аваад толгой дээрээ гаргаж байгаа мэт сэвхийтэл түлхлээ.
Түрүүний хэсэгт гардаг шиг "Чи яаж наад төмрөө өргөж даахав дээ. Бүтэлгүйгээ мэдэхгүй" гэж бодсон бол тэр туйванг газраас ч хөндийрүүлж чадахгүй. Яг үүн шиг өглөө болгон өөрийгөө дарлаад байвал таны ажил бүтэлтэй баймаар байна уу. Юу ч бүтэхээргүй байгаа биз дээ.Наад муу чамайг элдвээр хэлээд байгаа зүйлээ өнөөдрөөс эхлэн тархи толгойноосоо хөөж явуул.
