“Х-Түц” хамтлагийн алаг нүдэн Одноо буюу Гавьяат жүжигчин И.Одончимэг өнгөрсөн жилээс эхлэн UBS телевизээр үзэгчидтэй “Odnoo’s talk show” нэвтрүүлгээрээ уулзах болсон билээ. Уг нэвтрүүлэг цацагдаад багагүй хугацаа өнгөрсний дараа үзэгчдийн дунд Одноо зөвхөн телевизийн шоугаар дагнан тайзнаасаа бууна гэх бор шувуу нисэх болсон. Харин тэрээр үүнд, уран бүтээлээрээ хариу өглөө. Тэрээр “Х-Түц” хамтлагийн шинэ оны анхны хошин шогийн “Best of best” буюу шилдгийн шилдэг тоглолтод тайзнаа гаран үдэш бүр үзэгчдэд инээд бэлэглэж байна. Тиймээс, Одноог тайзнаа дахин харахгүй нь хэмээн битүүхэн түгшиж байсан фенүүдийнх нь санаа амарсан сурагтай.
“Odnoo’s talk show” нэвтрүүлэг дэлгэцнээ гарч эхэлсэн цагаасаа үзэгчдийг цэнхэр дэлгэцийн өмнө уях болсон. Одноог үзэгчид заримдаа уянгийн “халил”, сэтгэлийн хөдлөлөө ихдүүлэх гээд байдаг гэж шүүмжилдэг ч урлаг, соёлын ховор эрхэүүдийг урин оролцуулж, дурсамж, уран бүтээл, хувь хүний тэр бүр бусдын мэдээд байдаггүй нууцыг дэлгэн далангүй, ярилцдаг хэмээн үнэлдэг юм билээ. Ямартаа ч хайртай жүжигчинтэйгээ тайз, дэлгэцнээ уулзсаар л байх нь.
А.ЗУЛ
