Шоу ертөнцийнхний хамгийн дуулиант явдлууд

Пиппа Миддлтон од болов

Кейт Миддлтоны 27 настай дүү Пиппаг жилийн өмнө харсан хэн ч танихгүй байсан байх. Харин хунтайж, эгч хоёрынхоо хуриман дээр бэргэний хувцас өмсөн дэргэд нь зогссоноор бүсгүйн царай анх олны танил болж эхлэв. Харин тавдугаар сард нь тэрээр нэгэн үдэшлэг дээр дэндүү тачаангуй бүжиг хийж байгаа зураг нь хэвлэл мэдээллээр тархсанаар өнгөрөгч жил түүний тухай олон хэвлэл бичиж, ярьж, паппарацидаж, од болж эхэлсэн гэхэд хилсдэхгүй.

 

Ким Кардашианы бүтэлгүй хурим

31 настай реалити шоуны од Ким Кардашиан, NBA-ийн од Крис Хамфрис нар наймдугаар сарын 20-нд Калифорнийн Монтекитод 10 сая долларын өртөг бүхий сүр дуулиантай хуримыг хийсэн билээ. Гэвч түүнээс хойш 72-хон хоногийн дараа Ким салах өргөдлөө өгснөөр тэдний шуугиан дэгдээсэн, романтик гэрлэлт эцэс болжээ. Түүний дараа Крис эхнэрээ элдэв муухай үгээр хараан доромжилж, бүдүүлэг харьцдаг тухай хэвлэл мэдээллүүд дамжуулж эхэлсэн.

 

Эштон Катчерийн хууралт гэр бүлийг нь үгүй хийлээ

Холливудын хамгийн сайхан хосуудын жагсаалтанд зургаан жил дээгүүр байр эзэлсээр ирсэн 33 настай Эштон Катчер, 49 настай Деми Мур нар хамтын амьдралаа дуусгавар болгожээ. Учир нь Эштон, Сара Лиль гэх бүсгүйтэй зугаацаж, эхнэрээ араар нь тавьсан хэрэг хэвлэл мэдээллээр ёстой л улиг болтол цацагдсан нь түүний эхнэр Демигийн тэвчээрийг барж, тэрээр эцсийн эцэст салах өргөдлөө өгсөн юм.

 

 

Бэйонсигийн нууц задрав

Урьд хожид байгаагүй хамгийн их шуугиан дэгдээсэн шинэхэн ээж бол Бэйонси байлаа. Тэрээр хөл хүндтэй гэдгээ наймдугаар сард болсон MTV VMA наадам дээр зарласны дараа дэлхийн бүхий л хэвлэл мэдээллийнхэн Бэйонси болон түүний нөхрийн талаар хангалттай ихийг өгүүлсэн.

Марк Антони, Женнифер Лопез нарын салалт

Долоон жил хамтдаа амьдарч, Макс, Эмме гэх хоёр хөөрхөн ихрийн эцэг, эх болсон алдарт Латин хос Марк Антони, Женнифер Лопез нар долдугаар сарын 15-нй өдөр салж буйгаа мэдэгдлээ. Жүжигчин, поп од бүсгүй ийм шийдвэр гаргахад тун хэцүү байсан гэнэ. Гэвч эр нөхөр нь түүний секс бэлэг тэмдэг гэсэн нэрийг үзэн ядаж, дургүйцдэг байсан нь салах гол шалтгаан болжээ. Лопез ч зүгээр байсангүй салсан даруйдаа жүжигчин Брэдли Күпертэй нэр холбогдож, дараа нь 24 настай бүжигчин Каспер Смарттай амрагийн холбоотой болсон юм.

 

Арнольдийн цочролд оруулсан бяцхан хүү

Өнгөрөгч тавдугаар сард дөрвөн хүүхдийн эцэг, эх жүжигчин, Калифорни мужийн амбан захирагч Арнольд Шварцнегер болон телевизийн сэтгүүлч Мария Шривер нар 25 жилийн хамтын амьдралаа эцэс болгов. Шалтгаан нь юу байсан гээч? 20 жилийн турш тэдний гэрийн үйлчлэгч хийсэн Мильдред Баена гэх бүсгүй Арнольдын хүүг төрүүлж, 13 настай Жозеф хүү илэрснээр алдарт хос салах болжээ.

 

Чарли Шинь ялсан уу?

Хар тамхи хэрэглэж, согтуурсан жүжигчин Чарли Шинь, “Two and a Half Men” киноны найруулагч Чак Лорретой муудалцлаа. Тэдний маргаан олон сар үргэлжилсний эцэст арайхийн төгсгөл болсон. Энэ маргаанд идэвхтэй маргалдаж чадсан Чарли Шинь ялалт байгуулсан аж.

 

Женнифер Анистон хайраа олжээ

Алдарт Брэд Питтийн хуучин эхнэр, 42 настай Женнифер Анистон олон жил сэтгэлийн шархтай явсны эцэст жинхэнэ хайраа олжээ. Тэрээр “Wanderlast” киноныхоо хамтран тоглогч, 14 жилийн өмнө хайди Бивенс хэмээх найз бүсгүйгээсээ салсан Жастин Терокстой хайр сэтгэлийн холбоотой болсон юм. Сайхан хосуудын жагсаалтанд зүй ёсоор бичигдэн Брэд Питт, Анжелина Жоли нартай эн зэрэгцэн өрсөлдөх болсон хосууд одоо Нью-Йорк болон Лос-Анжелест байшин худалдан авч, хамтдаа амьдарч байгаа.

 

 

Баяртай гэж хэлэхэд дэндүү гунигтай

2011 онд дэлхийд алдар нэр нь түгсэн, олны хайртай цөөнгүй хүмүүс хорвоог орхисон билээ. Тэдний дотор дэлгэцийн домог болсон Дэйм Элизабет Тэйлор гуравдугаар сард 79 насандаа, долдугаар сард поп од залуухан бүсгүй Эйми Вайнхаус 27 насандаа, мөн “Real Housewives of Beverly Hills”-ийн од Расселл Армстронг 47 настайдаа таалал төгсч, шүтэн бишрэгчиддээ харуусал, гуниг авчирсан юм.

 

Жастин, Селена нарын шуугиан дэгдээсэн романтик дурлал

17-хон настай поп од Жастин Бибер, Диснейн од Селена Гомез нар романтик харилцаагаа хэнээс ч, юунаас ч эмээлгүйгээр зарласан явдал хэвлэл мэдээллийнхний гол бай болсон юм. Анх тавдугаар сард, тэд хамтдаа далайн эрэг дээр амралтаа өнгөрүүлэн, романтик аялал хийснээр дэлхий нийтээрээ тэднийг улам их сонирхох болсон билээ. Харин 11 дүгээр сард Жастин Биберийн хүүхдийг төрүүлсэн гэх Мария Еэтэр гэх бүсгүй гарч ирсэн. Гэсэн хэдий ч тэдний хайр сэтгэл унтарсангүй.

 

Рис Витерспүний шивээс

Америкчуудын хайртай жүжигчин бүсгүй Рис Витерспүн наймдугаар сард Хавайд усны хувцастай явж байхдаа хос шувууны шивээсээ ил гаргасан нь ёстой л олон хүнийг алмайруулжээ. Даруу, өгөөмөр зантайгаараа алдартай жүжигчин бүсгүйг ийм шивээстэй гэж хэн мэдэх билээ дээ. Тэрээр өнгөрөгч гуравдугаар сард гэрлэсэн, нөхөр Жим Тодын хамт амьдарч байгаа билээ.

 

Николь Ричигийн өөрчлөлт

2011 оны эхээр загвар зохион бүтээгч, бас ч үгүй хоёр хүүхдийн ээж болчихсон Николь Ричи бүсгүй хөхөндөө гоо сайхны мэс засал хийлгэсэн. Хүүхэд төрүүлснээр гоо сайхандаа гарсан өөрчлөлтийг засуулж буйгаа тэрээр өөрөө тайлбарлажээ.

 

Холливудын шинэхэн ээж нар

Өнгөрөгч 12 дугаар сард холливудын цөөнгүй одод хөл хүндтэй болсон билээ. Тэдний дотор Эрик Жонсонтой гэрлэсэн, жүжигчин, дуучин Жессика Симпсон болон Скот Дизиктэй гэрлэсэн Кортни Кардашиан нар багтаж байгаа юм.

 

Алдарт ээж, аав нар

2011 онд холливудын олон алдартай хосууд эцэг эх болцгоосон. Жишээлбэл, “Black Swan” киноны жүжигчин Натали Портман хамтрагч, бүжиг дэглээч Бенжамин Миллепайдтай гэрлэж, зургадугаар сард Алеф хэмээх өхөөрдөм хүүтэй болсон. Мөн дөрөвдүгээр сарын 30-ны өдөр поп од Мэрай Керри, жүжигчин Ник Кэннон нар Морроккан, Монро гэх хөөрхөн ихрүүдтэй болсон билээ. Харин долдугаар сард нь алдарт хөл бөмбөгчиний гэргий Викториа Бекхэм анхны охин Харпер Севенийгээ төрүүллээ.