БНМАУ-ын Сайд нарын Зөвлөлийн 1963 оны гуравдугаар сарын 1-ний өдрийн 77 дугаар тогтоолоор Гадаад явдлын яамны дэргэд ЮНЕСКО-гийн Монголын Үндэсний Комисс байгуулагдаад 50 дахь жилтэйгээ золгож байна.Энэ ойн хүрээнд “ЮНЕСКО ба Монгол улс” эрдэм шинжилгээний бага хурлыг гуравдугаар сарын 1-ний өдөр "Улаанбаатар" зочид будлын Их танхимд зохион байгуулах гэж байгаа аж. Мөн энэ үеэр 50 жилийн түүхэн гэрэл зургийн үзэсгэлэн болон ЮНЕСКО-оос шагнал хүртсэн гар урлалын батламжит бүтээгдэхүүн болох эсгий урлалын үзэсгэлэн, монгол уран бичлэгийн үзэсгэлэнг тус тус толилуулах юм байна. Түүнчлэн Монгол улсаас ЮНЕСКО-д бүртгүүлсэн соёлын биет бус өвийг тээгчид, өв уламжлагч ардын авъяастнууд хөөмий, уртын дуу, цуур, тууль хайлах урлагийн тоглолтыг сонирхуулахаар болсон тухайгаа зохион байгуулагчид нь мэдээллээ.
www.URLAG.mn
