Эх орончдын баярын өдрийг тохиолдуулан Монгол Улсад улс төрийн ууган хүчин МАН үүсэн байгуулагдсны 92 жилийн ой, НАМЗХ-ноос зохион байгуулдаг “Тусгаар тогтнолын цом-2013” яруу найргийн наадам өчигдөр буюу 27-ны өдөр Тусгаар тогтнолын ордонд дөрөв дэх удаагаа боллоо. Найрагчид эх орон, тусгаар тогтнолын сэдэвтэй шүлэг уншдагаараа онцлогтой энэхүү наадмын нэгийн даваанд 88 бүтээлийн эзэд өрсөлдсөнөөс хоёрын даваанд 25 яруу найрагч шалгарчээ. Ардын уран зохиолч, соёлын гавьяат зүтгэлтэн, “Болор цом”-ын эзэн П.Бадарч, төрийн шагналт, соёлын гавьяат зүтгэлтэн З.Дорж, “Болор цом”-ын дэд байрын шагналт О.Цэнд-Аюуш, Г.Баяр, Ш.Бадарч, Ж.Баярцэнгэл, М.Отгонбаяр, B.Нэргүй, С.Ууганбаяр, П.Нямлхагва зэрэг яруу найрагчид шүлгэн хүлгээ уралдуулж цомын эзнээ тодрууллаа.
Яруу найргийн наадмыг дэнслэхээр Зохиолчдын эвлэл, Д.Нацагдоржийн шагналт, “Болор цом”-ын эзэн Арлааны Эрдэнэ-Очир ерөнхий шүүгчээр ажиллажээ. “Тусгаар тогтнолын цом-2013” наадам өрсөлдөөн ихтэй үзэгч олонтой уур амьсгал халуухан байлаа. Цомын эзнээр П.Нямлхагва шалгарч, дэд байрыг В.Нэргүй, гуравт ардын уран зохиолч, төрийн шагналт П.Бадарч хүртлээ.
www.URLAG.mn
