Монголд шинээр мэндэлж байгаа Эзэн хааны театрынхан анхныхаа тоглолтыг Дуурь бүжгийн эрдмийн театрын тайзнаа “ROYAL” бүжгэн жүжгээр.толилуулав. Өндөр мэргэжлийн боловсон хүчин, тансаг орчин, уйгагүй хөдөлмөр, урт хугацааны чармайлт шаардлагатай сонгодог урлагийнхны хувьд өнөөдөр төрийн дэмжлэгтэйгээр шинэ уран бүтээл туурвисан ч учир дутагдалтай байгаа талаар гомдол гардаг. Ямар ч гэсэн сүүлийн үед дуурийн театр үзэгчдээр дүүрэн байж, шилмэл тоглолтуудын тасалбар 100 ам.доллароор ч олдохгүй ховордсон гэсэн сайхан мэдээ байгаа болохоор тэд энэ гарцыг харсан ч байж болох. Эзэн хааны нэрийг зүрхлэн тээхээр зориглосон Балетмейстер Д.Дашлхагва захиралтай шинэ театрын эхний тоглолтод БНСУ-ын балетын гоцлооч Пак Юн Жин урилгаар оролцсон. Өмнө нь УДБЭТ-д ажиллаж байсан болон Хөгжим бүжгийн коллежийн төгсөгчид энэ театрт нэгдээд байгаа бөгөөд мэргэжлийн бүжигчдийн баг хангалттай бүрдсэн нь эхний тоглолтоос харагдаж байлаа.. Дэлхийд гайхуулж байгаа Монголын уран бүтээлчдийн авьяас чадвар, сонгодог урлагийг өөрсдийн хүчин чармайлтаар театрын хэмжээнд босгоно гэсэн уран бүтээлчдийн хүсэл тэмүүлэл Монголын сонгодог урлагийн ертөнцөд шинэ үзэгдлийг биежүүлэн бататгаж, гайхамшгийг бүтээх болтугай.
Таныг урлагийн тэнгэр ивээг
www.URLAG.mn
