“Эндо Минорү” сан, Японы элчин сайдын яам, “Цэндийн Батчулуун” сан, Улсын филармони хамтран хөөмийчдийн дунд япон дууг хөөмийлөх уралдаан зохион байгуулж байгаа тухай мэдээллийг хүргэж байсан билээ.
Тус уралдаанд оролцогчид алдарт хөгжмийн зохиолч Эндо Минорүгийн “Хойд нутгийн хавар” дуу болон өөрсдийн сонгосон нэг бүтээлийг Морин хуурын чуулгатай хамтран үзэгчдэд толилуулсан юм. Монголын өнцөг бүлан бүрээс ирж хөөмийлсөн нас насны 30 хөөмийчид өөрсдийн ур чадвараа харуулан өрсөлдсөн.
Уралдааны дүн гарахад “Эрдэнэт” чуулгын хөөмийч М.Саруултөгс тэргүүн байр эзэлж, ҮДБЭЧ-ын морин хуурч, хөөмийч О.Чулуунбаатар, Ц.Цогтгэрэл нар удаах байруудыг эзэлжээ. Мөн ганц эмэгтэй оролцогч болох ҮДБЭЧ-ын ятгачин А.Ундармаа дөрөвдүгээр байрт шалгарсан байна. Харин Ховд аймгийн малчин Ч.Алтангэрэл шүүгчдийн нэрэмжит шагналыг хүртэж, уралдаанд оролцогчид “Хойд нутгийн хавар”-ыг зэрэг хөөмийлсөн нь үзэгчдийн сэтгэлийг хөдөлгөсөн сайхан зүйл болжээ.
www.URLAG.mn
