ЗХУ-ын Ардын жүжигчин Муслим Магомаевын дурсгалд зориулсан “Орфей-2024” олон улсын уралдаан өнөө жил долоо дахь удаагаа боллоо. Бүгд найрамдах Чечень улсад болсон уг уралдааныг “Соёл” үндэсний төслийн хүрээнд Бүгд Найрамдах Чечень улсын Соёлын яам, Аднан Шахбулатовын нэрэмжит Чеченийн Улсын филармони хамтран зохион байгуулжээ.
Тус уралдаанд энэ жил есөн орны 200 гаруй мэргэжлийн дуурийн дуучид нэгдүгээр шатанд оролцсоноос хоёрдугаар шатанд 81 дуучин тунаж үлдсэн бөгөөд хоёрдугаар шатанд шалгарсан дуучид Бүгд Найрамдах Чечень Улсын “Сувдан сондор” хэмээн өргөмжлөгдсөн Филармонийн тайзнаа өрсөлдсөн юм.
ОХУ-ын хөгжмийн дээд боловсролын тэргүүлэх академи, мэргэжлийн их, дээд сургуулиуд болон ОХУ-ын Большой, Мариинский, Новая опера, Геликон-Опера зэрэг томоохон театрууд, бүс нутгуудын эрдмийн театруудаас мэдүүлсэн тэргүүн гоцлоочдын дундаас сонгодог дуурийн 32-38 насны гоцлол төрөлд ДБЭТ-ын гоцлол дуучид болох Э.Отгонбат тэргүүн байр, Х.Мягмарсүрэн дэд байр, Л.Бүүвэйбаатар гутгаар байр эзэлжээ. Харин уралдааны 22-31 насны ангилалд ОХУ-ын Гнесиныхны хөгжмийн академийн магистрантурын III дамжаанд суралцаж буй Б.Доржнамжин гутгаар байр эзэлжээ. Мөн ЦДБЭЧ-ын дуучин Д.Совд, СУИС-ийн гуравдугаар курсын оюутан Н.Элбэгзаяа нарт тэргүүн зэргийн дипломантын өргөмжлөл гардууллаа.
