“Чингис хаан” одонт, Монгол Улсын Гавьяат жүжигчин, дуурийн дуучин Г.Ариунбаатар өдгөө ОХУ-ын “Мариинский” театраар овоглож буй. Тэрбээр хамгийн сүүлд театрынхаа тайзнаа өнөгрсөн арваннэгдүгээр сард Ж.Вердийн “Отелло” дуурийн Яго, Р.Леонковаллогийн “Паяцы” дуурийн Тониогийн дүрээр гарсан бол энэ сарын 2-нд Ж.Вердийн “Риголетто” дуурийн Риголеттогийн дүрд дуулаад байна. Түүнчлэн сонгодог урлагийн гайхамшгуудын нэг болох Большой театрт мөн арваннэгдүгээр сард “Риголетто” дуурьт дуулсан юм.
Тэгвэл тэрбээр Франц улсын Гренобль хотод арванхоёрдугаар сарын 7-нд “Травиата” дуурийн Жермонд, арванхоёрдугаар сарын 8-нд Парис хотын филармонид мөн “Травиата” дуурийн Жермонд дуулахаар болжээ.
Ташрамд дурдахад, “Би-Би-Си Кардифф” дэлхийн шилдэг дуучин шалгаруулах уралдааны шилдэг дуучнаар шалгарсан байсан Г.Ариунбаатар өнгөрсөн жил драм, хөгжимт жүжгийн театруудын дунд зохион байгуулдаг “Золотой Софит” наадмаас Ж.Вердийн “Набукко” дуурийн Набуккогийн дүрээр нэр дэвшиж, тухайн оны дуурийн шилдэг эрэгтэй дүрийн шагнал хүртсэн юм.
