18 дахь удаагийн “Гэгээн Муза” олон улсын театрын наадам ирэх тавдугаар сарын 16-24-нд болно. Драмын урлагийн шилдэг бүтээл, шилдэг уран бүтээлчийг тодруулдаг эл наадамд өнөө жил драмын жүжиг, хөгжимт жүжиг, хүүхдийн жүжиг, хоёр хүний жүжиг, нэг хүний жүжгийн төрөлд шилдгүүдийг шалгаруулах аж.
Наадамд өрсөлдөх театр, продакшн, уран бүтээлчдийн мэдүүлэг, жүжгийн бичлэгийг ирэх гуравдугаар сарын 15-ныг хүртэл [email protected] хаягаар хүлээн авах юм байна. Түүнчлэн мэдүүлгийн тэмдэглэлийг тухайн уран бүтээлийн найруулагч баталгаажуулж өгөх бөгөөд бичлэгийг Youtube сувагт байршуулж, холбоосыг дээр дурдсан цахим хаягт мэдүүлгийн хамт илгээх, ингэхдээ жүжгийн бичлэгийг нэр дэвшигчдийн ур чадварыг тод харуулж, мэргэжлийн өндөр түвшинд, чанарын шаардлага хангахуйц форматаар хийх шаардлагатай юм.
“Гэгээн Муза” наадмын нэгдүгээр шат:
Нэр дэвшүүлэх комисс бүтээлүүдийг бичлэгээр үзэж, мэдүүлгийн дагуу наадамд нэр дэвших бүтээл болон уран бүтээлчдийг сонгоно. Үзлэгийг 2025 оны гуравдугаар сарын 15-наас дөрөвдүгээр сарын 8-нд явуулж, хоёрдугаар шатанд шалгарсан уран бүтээл болон уран бүтээлчдийг дөрөвдүгээр сарын 10-нд зохион байгуулах “Гэгээн Муза” наадмын хэвлэлийн бага хурлаар нийтэд зарлана.
“Гэгээн Муза” наадмын хоёрдугаар шат:
Нэр дэвшсэн уран бүтээл болон уран бүтээлчдийг шалгаруулах комиссын нэгдсэн үзлэгт 2025 оны тавдугаар сарын 16-24-ний өдрүүдэд хамруулж, “Гэгээн Муза” наадмын шилдэг уран бүтээл, уран бүтээлчдийг тавдугаар сарын 24-ний өдөр зохион байгуулах Академийн шагнал гардуулах ёслолын ажиллагаагаар тодруулна.
