Олон улсын хүүхэд, залуучуудын театрын холбооны Монгол дахь үндэсний төвийнхөн Л.Ванганы нэрэмжит Завхан аймгийн Хөгжимт жүжгийн театр, “Бамбүү” хүүхэд, залуучуудын театртай хамтын ажиллагааны гэрээ байгуулжээ. Үүний хүрээнд уран бүтээл, уран бүтээлч солилцож, сургалтууд зохион байгуулахаар төлөвлөсөн байна.
Эл хамтын ажиллагааны хүрээний нэг онцлох ажил нь хүүхэд, залуучуудад зориулсан тайзны урлагийн олон улсын “Wanderlust” фестивалийг Монгол Улсад анх удаа зохион байгуулахаар болсон нь аж. Ирэх есдүгээр сард Завхан аймагт болох уг фестивальд Дани, Балба зэрэг найман орны театрын уран бүтээлчид оролцох юм байна. Ингэснээр Завханы хүүхэд, залуус дэлхийн театрын уран бүтээлүүдийг дэргэдээс нь үзэх боломж бүрдэж байгааг тус аймгийн Хөгжимт жүжгийн театрынхан онцоллоо.
