“John Wick” франчайзын спин-офф “From the World of John Wick: Ballerina” бүтээл ирэх зургаадугаар сарын 6-ны өдөр үзэгчдийн хүртээл болно. Тус кинонд жүжигчин Ана де Армас гол дүрийг бүтээсэн юм.
Ташрамд дурдахад, энэ дөрөвдүгээр сарын эхээр болсон “CinemaCon” арга хэмжээний үеэр “Lionsgate” кино компанийн зүгээс “John Wick” киноны тавдугаар ангийг хийхээр болсон тухайгаа албан ёсоор зарласан. Шинэ ангид жүжигчин Киану Ривз эргэн Жон Викийн дүрийг бүтээхээр болсон бөгөөд өмнөх ангиудад ажиллаж байсан найруулагч Чад Стахельски, продюсер Базил Айваник, Эрика Ли нар дахин тус төсөл дээр ажиллахаар болсон байна.
Одоогоор шинэ ангийн нэр, цацагдах огноо, үйл явдал гэхчлэн чухал мэдээллүүд цацагдаагүй байгаа хэдий ч үзэгчид Жон Викийн түүх адал явдалт үргэлжлэхээр болсонд тун баяртай байгаа гэнэ. Мөн цувралын найруулагч Чад Стахельски ирээдүйд “John Wick” франчайзаас сэдэвлэсэн анимейшн бүтээхээр төлөвлөж буй талаараа мөн хуваалцсан байна. Тус анимейшн дээр “John Wick” киноны нэгдүгээр ангид өгүүлдэг үйл явдлаас өмнөх түүхийг харуулах аж.
