Пуэрто Рикогоос гаралтай дуучин, реппер Bad Bunny Америкийн шилдэг их сургуулиудын нэг болох Йелийн их сургуульд судлагдах сэдэв боллоо. Тус сургуулийн оюутны хэвлэл болох “Yale Daily News” сонины мэдээлснээр тус сургуулийн сургалтын хөтөлбөрт 2025 оны намраас эхлэн “Bad Bunny: Musical Aesthetics and Politics” нэртэй шинэ хичээл нэмэгдэх гэж байна.
Тус хичээлийг Йелийн их сургуулийн Америк орон судлал, угсаатан зүйн тэнхимийн дэд профессор Альберт Лагуна заах бөгөөд тэрбээр энэ хичээлээ Bad Bunny-гийн уран бүтээлчийн ур чадвар болон соёлын нөлөөлөл гэсэн үндсэн хоёр чиглэлд төвлөрөн заахаар төлөвлөж буй аж. Альберт Лагуна энэ хичээлийг санаачлах болсон шалтгаанаа тайлбарлахдаа “Bad Bunny-гийн сүүлд гаргасан “DeBÍ TiRAR MáS FOToS” цомгийг сонсоод урам зориг авсан. Би Нью Орлеанс хотод аялаж байхдаа энэ цомгийг ахин дахин сонсож, Карибын тэнгисийн уур амьсгалыг мэдэрч байлаа. Цомогт буй бүх дуунууд, ая үг болгон нь сэтгэлд маань гүнзгий үлдсэн” гэж “Yale Daily News” сонинд өгсөн ярилцлагадаа дурдсан байна.
Энэ хичээлээр дамжуулан хөгжмийн төрөл зүйл, жанр, уран сайхны шийдлүүдийн цаана орших түүх, нийгмийн асуудлуудыг сонсож ойлгох чадварт оюутнуудыг сургахыг эрмэлзэж байгаа ажээ. Уг хичээл зөвхөн Bad Bunny-гийн фэнүүд төдийгүй Карибын бүс нутгийн хөгжим, соёл, түүхийг сонирхдог оюутнуудад маш сонирхолтой хичээл байх талаар профессор Альберт Лагуна онцолжээ.
