Бүгд Найрамдах Франц улсын Канн хотноо 2025 оны тавдугаар сарын 13-24-ны өдрүүдэд зохион байгуулагдаж буй 78 дахь удаагийн Каннын олон улсын кино наадамд Соёл, спорт, аялал жуулчлал, залуучуудын яамны харьяа Кино урлагийн зөвлөл болон Монгол Улсын уран бүтээлчид албан ёсны павильонтойгоор дөрөв дэх жилдээ оролцож байна.
Энэхүү кино наадмын дэргэдэх ”Marche du film” кино маркетын хүрээнд Кино урлагийн зөвлөлөөс олон улсын наадамд Монгол уран бүтээлчдийг оролцуулж олон улсын хамтарсан кино төсөл бүтээх боломж бий болгох зорилгоор “Mongolian films pitch session in Cannes” арга хэмжээг тавдугаар сарын 16-ны өдөр зохион байгуулна.
Арга хэмжээний үеэр Монгол улсын дөрвөн уран бүтээлч өөр өөрсдийн онцлог бүхий кино төслүүдээ олон улсын уран бүтээлчид болон продюсеруудад танилцуулах юм.
