78 дахь удаагийн Каннын олон улсын кино наадмын хүрээнд Соёл, спорт, аялал жуулчлал, залуучуудын яамны харьяа Кино урлагийн зөвлөл нь “Монгол кино төсөл танилцуулах” буюу “Mongolian films pitch session in Cannes” арга хэмжээг тавдугаар сарын 16-ны өдөр амжилттай зохион байгууллаа.
Энэхүү арга хэмжээнд Польш Хятад, Япон, Франц, Канад, Америк, БНСУ, Герман, Англи, Австрали, Нидерланд, Филиппин, зэрэг улс орны 50 продюсер оролцсон бөгөөд Монгол Улсын дөрвөн уран бүтээлч өөрсдийн төслөө танилцуулав.
Арга хэмжээний эхний хэсэгт уран бүтээлч тус бүр өөрийн төслийн товч агуулгыг танилцуулсан бол дараагийн хэсэгт уран бүтээлчид олон улсын продюсеруудтай тойргоор уулзаж тодорхой мэдээлэл өгч чөлөөт ярилцлага өрнүүлсэн юм.
Тус арга хэмжээнд танилцуулсан уран бүтээлчдийн төслийг 2025 оны дөрөвдүгээр сарын 1-ний өдрөөс 2025 оны дөрөвдүгээр сарын 10-ны өдрүүдийн хооронд хүлээн авсан бөгөөд нийт найман уран бүтээлч төслийн материал ирүүлснээс дараах дөрвөн төслийг сонгон шалгаруулсан билээ.
Үүнд:
- “I hate pink” – А.Энхтөгс
- “Sar” – Т.Алтантуяа
- “In the beginning” – Ч.Гэрэлээ
- “Dear my sweet sister” – Х.Баярмаа
Энэхүү арга хэмжээ нь Монгол Улсын уран бүтээлчид гадны улс орны продюсеруудтай хамтран ажиллах, Олон улсын хамтарсан төсөл хэрэгжүүлэх боломжийг бий болгож байгаагаараа онцлог юм.
