“Оскар”-ын шагналт жүжигчин Дензель Вашингтон даваа гараг /2025.05.19/-т Каннын кино наадмын хүндэтгэлийн “Алтан далдуу мод” шагналыг хүртжээ.
Тэрбээр 78 дахь удаагийн Каннын кино наадамд найруулагч Спайк Ли-гийн хамтаар “Highest 2 Lowest” буюу “Оргилоос ёроол хүртэл” хэмээх киногоороо оролцож байгаа бөгөөд даваа гарагт болсон нээлтийн ёслолын үеэр түүнд кино наадмын хүндэтгэлийн шагналыг гэнэтийн байдлаар гардуулсан байна.
2000 гаруй үзэгч цугларсан “Гранд Театр Люмьер” цогцолборт түүнд хүндэтгэлийн “Алтан далдуу мод” шагналыг гардуулан өгөх үед үзэгчид бүгд босч, удаан үргэлжилсэн алга ташилтаар хүндэтгэл үзүүлсэн бөгөөд Дензель Вашингтон үзэгчдээс суудалдаа суухыг гуйж, түүний хувьд огтхон ч мэдээгүй, төсөөлж ч байгаагүй гэнэтийн үйл явдал болж байгааг хэлж, үзэгч олонд болон найруулагч Спайк Ли-д баярлаж, талархаж байгаагаа илэрхийлжээ.
Найруулагч Спайк Ли, жүжигчин Дензель Вашингтон нар 35 жилийн хугацаанд хамтран ажиллаж байгаа юм. Тэд 1990 онд “Mo’ Better Blues”, 1992 онд “Malcolm X”, 1993 онд “Much Ado About Nothing”, 1998 онд “He Got Game” хэмээх уран бүтээлүүдэд хамтран ажилласан байдаг бол энэ жил ийнхүү тав дахь хамтрал болох “Highest 2 Lowest” киногоо Каннын кино наадмын үеэр нээлээ.
Сонирхуулахад, тэд Каннын кино наадамд анх удаагаа хамтдаа оролцож байгаагаас гадна жүжигчин Дензель Вашингтон “Highest 2 Lowest” киногоороо анх удаа тус фестивальд гол дүрийн жүжигчний хувиар оролцож байгаа ажээ.
Тэдний энэхүү кино нь Японы алдарт найруулагч Акира Куросава-гийн 1963 оны “High and Low” киног орчин үеийн хэлбэрт оруулан хийсэн римэйк бүтээл бөгөөд Нью-Йорк хот дахь дуу хөгжмийн томоохон компанийн тэргүүний талаар өгүүлдэг байна.
Уг киноны гол дүрүүдэд мөн жүжигчин Жеффри Райт, реппер A$AP Rocky нар тогложээ. “Highest 2 Lowest” кино наймдугаар сарын 22-ны өдрөөс эхлэн Америкийн кинотеатруудаар гарч эхлэх бол есдүгээр сарын 5-наас “Apple TV+” стрийминг үйлчилгээнд байршина.
