Францын тансаг зэрэглэлийн “Kering” групп, загвар зохион бүтээгч Пьерпаоло Пиччолийг “Balenciaga” брэндийн шинэ бүтээлч захирлаар томилогдон ажиллах болсон тухай албан мэдэгдэл гаргалаа. Түүний томилгоо нь “Kering” группийн хувьд томоохон өөрчлөлт сэлгээнүүдийн нэг бөгөөд өмнөх захирал Демна Гвасалия “Gucci”-гийн бүтээлч захирлаар шилжсэнтэй холбоотой хэмээн мэргэжилтнүүд үзэж байна.
Пьерпаоло Пиччоли өмнө нь “Valentino” брэндийн бүтээлч захирал болон бусад олон чухал албан тушаалыг хашиж байсан ба нийт 25 гаруй жил ажиллаж тус брэндийг шинэ түвшинд гарган ирсэн бүтээлч эрхэм билээ. Ер нь дан ганц өөрийн үзлээр загвар зохион бүтээх гэхээс илүү тухайн брэндийн уламжлалт хэв маяг, бусдаас ялгарах ондоошлыг хамтатган брэндийн ирээдүйн дүр төрхийг хэрхэн авч явах нь дизайнеруудын хувьд үргэлж чухал даалгавар байдаг. Энэ ч утгаараа тэрээр “Valentino” загварын ордны түүхийг амжилттай бичиж загварын салбарынхны дунд өөрийн авьяасыг бататган харуулж чадсан билээ. Эмэгтэйлэг байдлыг илүү эрхэмсэг болгож, даашинз гэдэг энгийн нэг хэрэглээ биш гэдгийг тэрээр “Valentino”-гийн он удаан жилийн баялаг түүхтэй сүлэлдүүлэн харуулж чадсан юм.
Үүгээр Итали гаралтай эрхэм “Balenciaga” ордны амин сүнс нь болж ажиллах шинэ эхлэл тавигдах гэж буй. Сүүлийн жилүүдэд тус загварын ордон багагүй шуугиан тарьсан ба зарим талаараа хэт орчин үеийн “Memecore” буюу интернэт давалгаанд суурилсан залуучуудын хэв маяг ажиглагдаж байсан нь Кристобаль Баленсиагагийн амьд ахуйдаа хийж үлдээсэн бүтээлүүд бараг мартагдах шахсан гэж дүгнэж болох.
Тэгвэл энэ удаа Пьерпаоло Пиччоли тус брэндийг хэрхэн авч явах нь сонирхол татаж байна. Тэр өнгөрсөн түүхийг нандигнан сөхөх үү, эсвэл шинэ үеийн залууст хандсан огт өөр өгүүлэмж бичих үү, эсвэл эмэгтэйлэг, уян зөөлөн өнгө аястай “Balenciaga” дахин сэргэх үү. Түүний анхны цуглуулга 2025 оны аравдугаар сард Парисын загварын долоо хоногт танилцуулагдах бөгөөд загварын ертөнцөд шинэ хуудсыг эхлүүлэх түүний бүтээлч ажил өндөр хүлээлт үүсгээд байна.
