Дэлхийн хамгийн нөлөө бүхий загварын сэтгүүлийн ерөнхий редактор Миранда Пристлигийн туслахаар ажилд орж буй Энди хэмээх залуу бүсгүйн талаар харуулдаг “The devil wears Prada” киног мэдэхгүй хүн ховор биз ээ.
Загварын ертөнц, карьер сонголт, эмэгтэйчүүдийн эрх мэдлийн тухай сонирхолтойгоор өгүүлдэг энэхүү кино нь 2006 онд анх үзэгчдийн хүртээл болсон даруйдаа кино шүүмжлэгчид болон олон нийтээс тун өндөр үнэлгээ авч байсан түүхтэй.
Тэгвэл “Variety” сэтгүүлийн мэдээлснээр тус киноны үргэлжлэл анги албан ёсоор хийгдэхээр болсон байна. Одоогоор шинэ ангийн үйл явдал, найруулагч зэрэг чухал мэдээллүүд ил болоогүй байгаа ч эхний ангийн гол дүрүүдийг бүтээсэн жүжигчин Энн Хэтэуэй, Мерил Стрип, Эмили Блант нар шинэ ангид эргэн ирэх нь батлагджээ.
“The devil wears Prada-2” киног 2026 оны тавдугаар сарын 1-ний өдөр зөвхөн кин театруудаар нээхээр товлоод байна.
