Стриминг үйлчилгээний “HBO Max” платформоос шидтэн хүү Харри Поттерын тухай цуврал хийхээр болсноо YouTube хуудсаараа дамжуулан албан ёсоор зарласан. Энэхүү цуврал нь нийт долоон бүлэг үргэлжлэх бөгөөд тус бүр Жоан Роулингийн боть номон дээр суурилсан аж. Төслийн гүйцэтгэх продюсерын ажлыг Нил Блэр, Рут Кенли-Леттс, Жоан Роулинг нар хариуцахаар болоод буй.
Харри Поттерын тухай цувралд Альбус Дамблдорын дүрд жүжигчин Жон Литгоу, Северус Снейпийн дүрд Паапа Эссиеду, профессор Макгонагалд Жанет Мактир, профессор Квиринус Квирреллд Люк Таллон, Хагридын дүрд Ник Фрост, Аргус Филчид Пол Уайтхаус нарын жүжигчид тоглохоор сонгогдоод буй юм.
Тэгвэл цувралын гол дүрүүд болох шидтэний сургуулийн шинэхэн элсэгчид болох Харри Поттер, Хермионе Грэнжер, Рон Уисли нарын дүрд Доминик МакЛафлин, Арабелла Стантон, Аластайр Стоут тоглохоор сонгогджээ. Гол дүрийн гурван жүжигчин 9-11 насны хүүхдүүд юм.
Өнгөрсөн жил эхэлсэн гол дүрийн жүжигчдийн сонгон шалгаруулалтад ойролцоогоор 30 000 гаруй хүүхэд оролцсон байна. Сонгон шалгаруулалт явуулсан албаны төлөөлөгчид албан ёсны мэдэгдэлдээ шалгарсан хүүхдүүдийн жүжиглэх авьяас онцгой байсан гэдгийг тодотгожээ.
Сонирхуулахад, уг цувралд зориулан бичил хот байгуулахаар болжээ. Тодруулбал, цувралын зураг авалтад зориулсан бичил хотыг 1.25 тэрбум ам.доллароор босгох тухай “Collider” хэвлэл мэдээлжээ.
Түүнчлэн цувралын зураг авалт 2026 онд эхлэх төлөвлөгөөтэй байгаа бөгөөд 2027 онд үзэгчдийн хүртээл болгохоор товлоод байгаа аж.
