Нийслэлийн Засаг дарга бөгөөд Улаанбаатар хотын захирагчийн ивээл дор зохион байгуулж буй “Улаанбаатар биенналь 2025” олон талт соёл, урлагийн нэгдсэн үйл ажиллагаанд нийт дэлхийн 29 орны 300 орчим гадаад оролцогчид, 22 багц үйл ажиллагааг 06 сарын 06-20-ний өдрүүдэд буюу 15 хоногийн турш зохион байгуулж буй.
Энэ хүрээнд уран бүтээлч А.Жавхлангийн ханын зургийн нээлт 06 дугаар сарын 09-ний өдөр боллоо. “Лус” сэдэвт энэхүү ханын зураг нь Сөүлийн гудамжинд байрлаж буй. Ойролцоогоор 6х15 метр хэмжээтэй эл монументаль ханын зурагтаа уран бүтээлч лус хэмээн монголчуудын нэрлэдэг газар усны эзэн буюу тогтсон бие, дүрс үгүй ч домог үлгэрүүдэд олон янзаар дүрслэгдэн хувирах шүтээнийг дүрсэлжээ. Улаанбаатар хотын төвд, нийтийн явган хүний зам дагуух энэхүү бүтээл нь энгийн гудамжийг урлагийн орон зай болгон хувиргаж, уламжлал танка зургийн нарийн бэлгэдлийг орчин үеийн урлагийн илэрхийллээр хослуулан дүрсэлсэнээрээ онцлог юм.
