Орчин үеийн дуу хөгжмийн фанк (funk) урсгалыг үндэслэгчдийн нэг болох “Sly and the Family Stone” хамтлагийн ахлагч, хөгжимчин, дуучин Слай Стоун 82 насандаа таалал төгссөн талаар түүний гэр бүл даваа гараг /2025.06.09/-т мэдэгджээ.
Тус мэдэгдэлд уран бүтээлч агсанг уушгины өвчинтэй удаан хугацаанд тэмцээд нас барсан болохыг мэдээлсэн байна.
Талийгаач Слай Стоуны жинхэнэ нэрийг Сильвестр Стюарт гэдэг. Тэрээр багадаа ах, эгч нарынхаа хамтаар сүмийн дуу дуулдаг байсан бол 1960-аад оноос Сан Франциско хотын радио станцуудад DJ хийж эхэлснээр уран бүтээлийн гараагаа эхэлсэн ажээ.
Удалгүй тэрээр төрсөн ахтайгаа хамт “Sly and the Family Stone” хамтлагаа байгуулж, анхандаа сүмийн дуу хөгжим тоглодог байсан бол яваандаа афро, психеделик, фанк, хиппи-рок урсгалыг хослуулж тоглодог болжээ.
Тэдний 1967 онд гаргасан “Dance to the Music” хэмээх анхны сингл нь Биллбордын шилдэг поп дууны жагсаалтын 8-р байрт бичигдсэн юм. Тус хамтлаг орчин үеийн дуу хөгжмийн ертөнцийн түүхэнд дурсагдах гайхалтай тоглолтыг 1969 онд домогт “Вүүдсток” хөгжмийн наадамд, мөн тус онд Нью-Йорк хотын Харлемд зохиогдсон “Summer of Soul” концертоор үзүүлсэн юм.
“Sly and the Family Stone” хамтлагийг 1993 онд Рок-н-ролл хөгжмийн музейн Алдрын танхимд мөнхөлжээ. Слай Стоун олон жил завсарласны эцэст 2005 оны “Грэмми” шагнал гардуулах ёслолын тайзан дээр тоглосон бөгөөд түүнээс хойш цөөн удаа тайзнаа тоглосон байдаг юм.
Түүнийг “Поп, фанк, рок хөгжмийн үндэс суурийг дахин тодорхойлсон шинийг санаачлагч, жинхэнэ анхдагчдын нэг, гайхалтай уран бүтээлч байсан” хэмээн гэр бүл нь онцолсон байна.
