Жүжигчин Н.Баясаа, С.Батзориг, Г.Лхагвацэрэн, У.Цогтбаяр, Р.Сүхболд нар буюу “Xermel crew”-ийн уран бүтээлчид, “F” студи хамтран “In da House” адал явдалт, инээдмийн уран сайхны киног 2021 онд үзэгчдэд хүргэж байв. Уг киноны үйл явдал эрүүгийн цагдаагийн хэлтсийн мөрдөгчид хууль бус гэмт бүлэглэлийн араас мөрдөх явцдаа өнгөлөн далдлалт хийж цуйвангийн газар ажиллуулж эхэлснээр өрнөж эхэлдэг бол 2022 онд “In da House: Come back” киног үргэлжлүүлэн бүтээж байв. Мөн уг уран бүтээлчид “In da House 3: in Korea” киног БНСУ-ын уран бүтээлчидтэй хамтран бүтээснээ өнгөрсөн гуравдугаар сарын 6-наас бүх кинотеатруудаар үзэгчдийн хүртээл болгосон юм.
Тэгвэл тус уран бүтээл Өмнөд Солонгост гаргаж эхэлжээ. Тодруулбал, “In da House 3: in Korea” киног өчигдөр /2025.06.11/ Өмнөд Солонгосын хамгийн том кинотеатруудын нэг болох “Starfield Coex” кинотеатрт нээж, нээлтийн үзвэрт тус улсын youtuber, tiktoker, тамирчин, модель гэхчилэн 400 инфлюнсерт толилуулжээ.
“In da House 3: in Korea” инээдмийн уран сайхны киног зургаадугаар сарын 27-ноос Өмнөд Солонгосын CGV, “Megabox”, “Lotte cinema”-гийн бүх салбар кинотеатраар гаргахаар болжээ.
