“Squid Game” цувралын гуравдугаар бүлэг АНУ-ын Нью-Йорк хотноо дэлхийн нээлтээ хийлээ. Нью-Йоркт болсон нээлтийн арга хэмжээнд жүжигчин Ли Жун Жэ, Ли Бён Хун, Им Си Ван, Пак Сун Хун, Кан Ае Шим, Жо Ю Ри, найруулагч Хван Дун Хюк зэрэг уран бүтээлчид улаан хивсний тайзнаа гарч, шүтэн бишрэгчидтэйгээ уулзсан байна.
“Squid Game” цувралын найруулагч Хван Дун Хюк энэ үеэр үзэгчдэдээ хандан “Бид гуравдугаар бүлгийг аль болох хурдан хүргэхийн тулд чадах бүхнээ хийсэн. Урмыг нь хугалахгүй гэж амлаж байна” гэжээ. “’Squid Game-3′ цувралын шинэ бүлэг зургаадугаар сарын 27-ны өдөр “Netflix” дээр албан ёсоор нээлтээ хийнэ.
Энэхүү цуврал өнөөдрийг хүртэл “Netflix”-ийн хамгийн олон үзэлттэй, тус платформын дээд амжилтуудыг тогтоосон цуврал хэвээрээ байна. Эхний бүлэг нь 265.2 сая үзэлтээр тэргүүлдэг бол хоёрдугаар бүлэг нь 192.6 сая үзэлтээр удаалдаг юм.
