Английн тагнуулч Жеймс Бондын тухай шинэ киног Франц-Канадын авьяаслаг найруулагч Дени Вилленёв найруулахаар болсон талаар Жеймс Бонд франчайзын эрхийг эзэмшигч “Amazon MGM Studios” компанийн зүгээс өнгөрсөн пүрэв гараг /2025.06.26/-т мэдэгдсэн байна.
Тус компанийн зүгээс Эми Паскаль, Дэвид Хэйман нарыг киноны продюсераар ажиллана гэж мэдэгдэж байсан бол пүрэв гарагт Таня Лапойнтег ерөнхий продюсераар ажиллахаар болсныг давхар мэдэгдлээ.
“Sicario”, “Arrival”, ”Blade Runner 2049”, ”Dune: Part One”, “Dune: Part Two” зэрэг олон шагнал хүртэж, нийтдээ хэдэн тэрбум ам.долларын ашиг орлого олсон томоохон уран бүтээлүүдээрээ алдартай, Оскарын шагналт найруулагч Дени Вилленёв мөн тагнуулч 007-гийн шинэ киног найруулахаар болсон нь түүний хувьд нэр төрийн хэрэг, давхар том үүрэг хариуцлага гэдгийг онцолж, багаасаа Жеймс Бондын цувралыг үзэж өссөн, Жеймс Бондын шүтэн бишрэгч гэдгээ хэлж, түүнд итгэл хүлээлгэсэн Amazon MGM Studios компанид талархал илэрхийлжээ.
Цахим худалдааны салбарт тэргүүлэгч Amazon компани 2022 онд MGM кино студийг 4000 гаруй кино, 17000 телевизийн шоу нэвтрүүлгийн хамт худалдан авч байсан бол энэ оны 5-р сард Amazon MGM Studios компани Жеймс Бонд франчайзын оюуны өмчийн эрхийг эзэмшигч болсон юм.
Ийнхүү тус компанийн зүгээс Жеймс Бондын 26 дахь бүтээлийг найруулах найруулагчийг энэ зун сонгон тодруулна хэмээн мэдэгдэж байснаараа авьяаслаг уран бүтээлч Дени Вилленёвыг сонгоод байгаа бол төлөвлөгөөний дагуу кино зохиол бичих болон жүжигчдийн сонгон шалгаруулалтын ажил үргэлжлэх ажээ.
Харин найруулагч Денни Вилленёвын хувьд “Dune” цувралын гуравдугаар анги болох “Dune: Messiah” киноны ажилдаа энэ зун орж байгаа бөгөөд тус кино 2026 оны 12-р сард дэлгэцнээ гарахаар товлогдсон байна.
