“The social network” киноны хоёрдугаар анги гарна

2010 онд үзэгчдийг байлдан дагуулж, гурван “Оскар”-ын эзэн болсон “The social network“ киноны үргэлжлэл болох “The social network: Part II” бүтээл албан ёсоор хийгдэж эхэлжээ. Энэ удаад эхний ангийн киноны зохиолыг бичсэн Аарон Соркин найруулагчийн үүргийг мөн давхар биелүүлэхээр болсон байна.

“Deadline”-ийн мэдээлснээр шинэ киног эхний ангийн шууд үргэлжлэл хэлбэрээр биш харин “Wall Street journal”-ийн сэтгүүлч Жефф Хоровицын гаргасан “The facebook files” хэмээх цуврал нийтлэлээс сэдэвлэн хийа гэнэ. Тус нийтлэлүүдэд “Facebook” компанийн дотоод баримтуудын алдагдлын талаарх мэдээлэл багтсан бөгөөд тэдний нийгэмд үзүүлж буй сөрөг нөлөөллийг тус компанийн зүгээс мэдэж байсан талаар ил болгосон нь тухайн үедээ олны анхаарлыг багагүй татаж байв.

Харин шинэ ангийн гол дүрд Жесси Эйзенберг, Эндрю Гарфилд, Жастин Тимберлейк нар дахин тоглох эсэх нь одоогоор тодорхойгүй байгаа ч продюсероор Тодд Блэк, Питер Райс, Стюарт Бессер нар ажиллахаар болжээ. “The social network: Part II” киноны албан ёсны трейлер болон нээлтээ хийх огноог тун удахгүй зарлах аж.