Жүжигчин Брэд Питт гол дүрийг нь бүтээсэн “F1” кино дэлхийн кино театруудын дэлгэцнээ анх гарсан амралтын өдрүүдэд 144 сая ам.долларын орлого олжээ.
Өмнө нь “Top Gun: Maverick” кинонд Том Крузтэй хамтран ажилласан Жозеф Косински уг киног найруулжээ. Киноны үйл явдал “Формула-1”-ийн уралдаанч асан Сонни Хейсийн (Брэд Питт) тухай түүхийг өгүүлнэ. 1990-ээд онд уралдаанчийн замналаа дуусгасан түүнд олон жилийн дараа багийнх нь эзэн хоёрдугаар нисгэгчийн хувиар, мөн ирээдүйтэй залуу уралдаанч Жошуа Пирсийг (Дэмсон Идрис) дасгалжуулахын тулд уралдааны замд эргэн ирэхийг санал болгодог. Уг кинонд мөн Хавьер Бардем, Демсон Идрис, Симон Эшли зэрэг жүжигчид тоглосон байна.
“F1” киног “Apple” компани дэлхийн кино театруудад гаргажээ. Мөн продюсерээр “Формула-1”-ийн дэлхийн аварга Льюис Хэмилтон ажилласан байна. Түүнчлэн киног бүтээхэд “Top Gun” цувралын продюсер Жерри Брукхаймер оролцжээ. Киноны зургийг “Формула-1”-ийн уралдааны замууд дээр авсан байна.
Тус кино дэлхийн кино театруудад зургаадугаар сарын 27-ноос гарч эхэлсэн бөгөөд Америкийн кино театруудаас 55.6 сая долларын орлого олсон бол үлдсэн 88.4 саяыг нь 78 улсын зах зээлээс цуглуулжээ.
