Тулгар төрийн 2234 жил, Их Монгол Улсын 819 жил, Үндэсний тусгаар тогтнолоо сэргээн мандуулсны 114 жил, Ардын хувьсгалын 104 жилийн ой, Ардчилсан хувьсгалын 35 жилийн ой, үндэсний их баяр наадмын хүрээнд уламжлал болгон зохион байгуулдаг “Дээлтэй Монгол” наадам Төв талбайд эхэллээ.
19 дэх жилдээ уламжлал болгон зохион байгуулж буй эл арга хэмжээ нь Монголчуудын үндэсний хувцас, уламжлал, биет болон биет бус соёлын өвийг түгээн дэлгэрүүлэх, хойч үедээ өвлүүлэн үлдээх, олон улсад сурталчлах, аялал жуулчлалын шинэ бүтээгдэхүүн, үйлчилгээг бий болгох зорилготой юм.
Арга хэмжээг Нийслэлийн Засаг даргын Тамгын газар, Нийслэлийн Аялал жуулчлалын газар, Хүүхэд, залуучуудын театр хамтран зохион байгуулж байгаа бөгөөд Соёл, спорт, аялал жуулчлал залуучуудын яам, Засгийн газрын хэрэгжүүлэгч агентлаг Соёл урлагийн газар, дүүргүүдийн ЗДТГ, Монголын Аялал жуулчлалын холбоо, Монгол Костюмс ХХК зэрэг байгууллагууд дэмжин оролцож байна.
Өнөө жилийн “Дээлтэй Монгол” наадмын хүрээнд:
- Үндэсний хувцастай иргэдийн жагсаал
- Ардын урлагийн тоглолт, мэндчилгээ
- Үндэсний хувцасны загварын үзүүлбэр
- Дээл, хувцастай холбоотой уралдаан тэмцээнүүд
- Монгол гэр хотхон, зан заншлын үзүүлбэр
- Үндэсний тоглоом, дээл хувцасны үзэсгэлэн худалдаа
- Тойрон бүжиг зэрэг арга хэмжээ болно.
Энэ жилийн “Дээлтэй Монгол” наадамд Монгол туургатан улс орнуудын төлөөлөл оролцохоос гадна БНХАУ-ын Өвөр Монгол, Шинжаан Уйгарын төлөөлөгчид оролцож, угсаатны хувцас, өв соёлоо танилцуулан өөрсдийн угсаатны хувцасны онцлогийг харуулан хүндэтгэлийн жагсаалд алхлаа.
Жил бүр 10.000 гаруй оролцогч, 15.000 гаруй үзэгчийг хамардаг “Дээлтэй Монгол” наадам нь нийслэлийн иргэд төдийгүй гадаад, дотоодын жуулчдын сонирхлыг татсан үндэсний онцлог бүхий арга хэмжээ болж байна.
