“Сэр сэр салхи” киногоороо олон улсын томоохон кино наадмуудад амжилттай оролцсон найруулагч Пүрэв-Очирын Лхагвадуламын бас нэгэн шинэ бүтээл дэлхийд үнэлэгдэж эхлэв. “Гуру медиа” болон Францын “Аврора филмс” компанийн ээлжит шинэ уран бүтээл “Урагшаа харсан цонх” (A south facing window) хэмээх богино хэмжээний кино нь 78 дахь удаагийн Локарно олон улсын кино наадмын Pardi di Domani-Concorso Corti d’Autore буюу уралдаант хэсэгт албан ёсоор сонгогдон, ирэх наймдугаар сард дэлхийн нээлтээ хийхээр болжээ.
Найруулагч П.Лхагвадуламын элкино нь хүйтэн, хөндий болсон харилцаагаа эргүүлэн аврахаар хичээж буй залуу хос хэрхэн бие биенээ ойлгон, асуудлаа даван туулж буйг нэмэлт хачиргүй, уран сайхны энгийн өгүүлэмжээр дүрсэлсэн бүтээл юм. Хонконгийн “Asian film awards academy”-ийн дэргэдэх “International film camp” хөтөлбөр болон Францын Үндэсний кино урлагийг дэмжих сан, “Арте Франц” зэрэг байгууллагын дэмжлэгтэйгээр бүтсэн киноны продюсерээр “Аврора филмс”-ийн Катя Казах, “Гуру медиа”-гийн Х.Оюундарь, зураглаачаар Португалийн Васко Виана ажилласан бол гол дүрд залуу жүжигчин М.Аззаяа, М.Алтаншагай нар тогложээ.
