Британи гаралтай Францын дуучин, жүжигчин Жэйн Биркинд зориулж урласан “Hermès” брэндийн анхны цүнх “Sotheby’s” ордноос зохион байгуулсан дуудлага худалдаагаар 10 сая ам.доллароор зарагдсанаар дуудлага худалдаагаар хамгийн өндөр үнээр зарагдсан цүнх болжээ.
Өмнө нь 2021 онд алмаазан шигтгээтэй, матрын арьсан “Hermès Kelly” загварын цүнх 513 мянган ам.доллароор зарагдаж дээд амжилт тогтоож байв.
“Hermès Birkin” цүнхний анхны загвар болсон уг цүнхийг Японы нэрээ нууцалсан нэгэн цуглуулагч худалдан авсан байна.
Энэхүү цүнхийг жүжигчин, дуучин бүсгүйд тусгайлан зориулж хийсэн байна. Жэйн Биркин уг цүнхийг 1985-1994 оныг хүртэл бараг өдөр бүр хэрэглэж байжээ. Анхны “Birkin” цүнхийг 1994 онд Жэйн Биркин өөрөө ДОХ-ын судалгаанд зориулсан хандивын дуудлага худалдаагаар худалдсанаас хойш эзэн нь хэд хэдэн удаа солигдсон байна.
“Hermès”-ийн анхны “Birkin” цүнх нь хэмжээ, салгаж болдоггүй оосор, дахин давтагдаагүй өвөрмөц хийц хэлбэр зэргээрээ дараагийн загваруудаасаа ялгаатай ажээ.
