“Netflix” компани зардлаа танах зорилгоор өөрсдийн бүтээлдээ анх удаа хиймэл оюуны эффектүүдийг ашигласан талаараа мэдэгдсэн байна.
Стрийминг үйлчилгээний хамгийн том платформ болох тус компанийн дэд гүйцэтгэх захирал Тед Сарандос энэ талаар хийсэн мэдэгдэлдээ Аргентины шинжлэх ухааны уран зөгнөлт “The Eternaut” хэмээх телевизийн цуврал бүтээлд гардаг барилга нурж буй хэсгийг хиймэл оюуны технологи ашиглан бүтээсэн нь тус компанийн түүхэнд анхны тохиолдол болсон бөгөөд үүгээрээ кино продакшны багийнхан тухайн хэсгийг маш хурдан хугацаанд, бага зардлаар бүтээж чадсаныг онцолжээ.
Энтертайнмент салбарт хиймэл оюуны технологийг ашиглах явдал нь бусдын зөвшөөрөлгүйгээр контент бүтээх, мөн хүний ажлыг орлох буюу булаах гэсэн болгоомжлолоос үүдэн нэлээд маргаантай байдаг сэдэв билээ.
Тед Сарандосын дээрх мэдэгдэлтэй зэрэгцээд “Netflix” компани хоёрдугаар улирлын тайлангаа танилцуулсан байна. Тус компанийн орлого зургаадугаар сарын эцэс хүртэлх гурван сарын хугацаанд өмнөх оны мөн үетэй харьцуулахад 16 хувиар өсөж, 11 тэрбум ам.доллар болсноос гадна ашиг нь өмнөх оны мөн үеийн 2.1 тэрбум ам.доллароос 3.1 тэрбум ам.доллар болж өссөн байна.
Нийт орлого болон ашгийн хэмжээ төсөөлснөөс илүү үзүүлэлттэй гарсан нь 122 сая гаруй үзэлт аваад байгаа Өмнөд Солонгосын “Squid Game” цувралын гурав дахь буюу сүүлчийн бүлгийн амжилттай шууд холбоотой гэдгийг компанийн зүгээс тодотгосон байна.
