Өмнөд Солонгосын алдарт найруулагч Пак Чан Ук өөрийн шинэ уран бүтээл болох “No Other Choice” киноны постерыг цацаж, үзэгчдийн дунд хүлээлт үүсгэв.
Тэрбээр 2003 онд “Oldboy” киногоороо Өмнөд Солонгосын төдийгүй дэлхийн кино урлагт тэсрэлт хийж, найруулагчийн чансаагаа харуулсан юм. “Oldboy” кино олон нийтийн хүртээл болсон цагаасаа хойш кино наадмуудаас 43 шагнал хүртсэн бөгөөд “Бүх цаг үеийн шилдэг арт кино жагсаалт”-ын дээгүүрт бичигдэх болсон билээ.
2016 онд мөн түүний зохиолыг нь хамтран бичилцэж, найруулсан “The Handmaiden” кино BAFTA кино наадмын “Гадаад хэл дээрх шилдэг кино” шагналыг хүртэж, кино шүүмжлэгчдээс сайн үнэлгээ авсан юм.
Тэрбээр “No Other Choice” киногоо энэ онд багтаан үзэгчдийн хүртээл болгох бөгөөд тус киноны гол дүрд Өмнөд Солонгосын кино одууд болох И Бён Хун, Сон Е Жин нар тоглож байгаа аж.
