Монгол туургатны ерөөлч магтаалчдын олон улсын анхдугаар наадмыгс Өвөрхангай аймагт анх удаагаа зохион байгууллаа. Энэхүү олон улсын анхдугаар наадамд ОХУ-ын Буриад, Халимаг, Тува улс, БНХАУ-ын ӨМӨЗО-ны болон Монгол Улсын нийслэл Улаанбаатар хот, 15 аймаг, өвлөн уламжлагчид, ерөөлч магтаалчид оролцлоо.
Тус арга хэмжээг нээж, аймгийн ИТХ-ын дарга Т.Нарангарав үг хэлэхдээ, “Монголын төр нийгэм, шашин соёлын суут зүтгэлтэн, анхдугаар Богд, өндөр гэгээн Занабазарын мэлмий гийсний 390 жилийн ойн хүрээнд зохион байгуулагдаж буй энэхүү наадам нь Монголчуудын оюуны дахин давтагдашгүй соёлын биет бус өв, эх хэл, түүний аман илэрхийллийн онцгой хэлбэр болох ерөөл, магтаалын урын санг баяжуулах, өвлөн уламжлуулах, түгээн дэлгэрүүлэх, үгийн урлагийг эзэмшигч, монгол үндэстний ерөөлч, магтаалчдыг олон улсын хэмжээнд алдаршуулан сурталчлах, монгол төрийн голомт, өндөр гэгээнтний өлгий нутгийн уул ус, тэнгэр газарт үгэн мялаалга өргөж, монгол аман билэг, цэц оюунаар ашдын сайхныг билэгдэж, түмэн олныг баясуулан цэнгүүлэх зорилготой билээ.
Ерөөлч магтаалчдын олон улсын анхдугаар наадмыг зорин ирсэн нийт өвлөн уламжлагчид, ерөөлч магтаалчид та бүхэнд Өндөр Богдын мэлмий гийсэн нутаг, хангай, говь, тал хээр хосолсон Монгол улсын хүйс цэгт аман билгийг уралдуулж, абшиг жанлавыг хүртэж тавтай наадахын айлтгал өргөе.
Энэхүү наадмыг олон хүний өв, уламжлалаа гэсэн сэтгэл зүтгэл, эв нэгдлийг зангидан зохион байгуулж байгаа бөгөөд, энэхүү наадамд морилон ирсэн Монгол Төрийн хан хуурыг 33 жил эгшиглүүлж буй төрийн хан хуурч, Монгол улсын Ардын жүжигчин, соёлын гавьяат зүтгэлтэн, Буриад улсын гавьяат жүжигчин, хэл бичгийн ухааны доктор, профессор Цэенгийн Цэрэндорж, Өвөрхангай аймгийн Хайрхандулаан сумын харьяат Шинжлэх ухааны академийн секторын эрхлэгч Аюушжавын Алимаа болон өв соёл судлаачид, эрдэмтэд, аман өвийн чиглэлээр ажил арга хэмжээ зохион байгуулж, үнэтэй хувь нэмэр оруулан ажилладаг төрийн болон төрийн бус байгууллагын зүтгэлтнүүдийг онцлон дурьдаж, гүн хүндэтгэл илэрхийлье” хэмээсэн юм.
