HBO-ийн алдарт бүтээл, шүүмжлэгчдээс өндөр үнэлгээ авсан, дүрслэл болон дотоод сэтгэлийн хурц илэрхийлэл бүхий “Euphoria” цувралын гуравдугаар бүлэг олон үзэгчдийн хүлээлтэд дарагдаад байгаа билээ. Харин энэ удаад уг цувралын уран сайхны ертөнцийг улам гүнзгий илэрхийлж, хөгжмийн хэлээр мэдрүүлэх хөгжмийн зохиолчоор домогт Ханс Зиммер ажиллахаар болжээ.
“Interstellar”, “Inception”, “Dune”, “Gladiator” зэрэг дэлхийн шилдэг кинонуудын хөгжмийг бичиж, ажиллаж байсан түүний дараагийн ажиллах кино “Euphoria“ байна гэж хүмүүс огт төсөөлөөгүй байсан нь лавтай.
Өмнөх улирлын хөгжмийг англи дуучин Labrinth амилуулж байсан бөгөөд энэ улиралд ч мөн Ханс Зиммертэй хамтран хөгжим дээр ажиллах гэнэ. Орчин үеийн өсвөр насныхны дотоод зөрчил, хүсэл, нуугдмал шаналлыг дэлхийн түвшний симфони хэмнэл, электро-органик нэгдэлтэйгээр илэрхийлнэ гэдэг үзэгчдийн хувьд гайхалтай шинэ мэдрэмжийг авчрах нь гарцаагүй биз ээ.
