Судлаачид МЭӨ 2055–1650 оны үед хамаарах, 4,000 жилийн настай Египетийн эртний бунханд зориулсан шавар эдлэл дээр үлдсэн хүний гарын мөр олжээ. Энэхүү ховор олдворыг ирэх аравдугаар сард Их Британид зохион байгуулагдах үзэсгэлэнд олон нийтэд дэлгэн үзүүлнэ гэж BBC мэдээлжээ.
Энэ гарын мөрийг олсон нь “тун ховор бөгөөд сэтгэл хөдөлгөм нээлт” хэмээн уг үзэсгэлэн дээр ажиллаж буй зохион байгуулагчдын нэг, египетч судлаач Хелен Струдвик хэлжээ. Кембрижийн их сургуулийн судлаачид “Үхэгсдийн сууц” (soul house) хэмээн нэрлэдэг шавар баримлаас уг ул мөрийг олжээ. Энэ нь эртний Египетчүүдийн оршуулгад ашиглагддаг байшин хэлбэртэй шавар эдлэл гэж Британийн музей тайлбарласан байна.
Фицвиллиам музейн ахлах судлаач Струдвикийн хэлснээр, уг гарын мөрийг шавар эдлэл хатахаас өмнө бүтээгч нь үлдээсэн гэжээ.
“Бид өмнө нь нойтон лакан дээр үлдсэн хурууны хээ болон чимэглэлтэй авс дээр багахан хэмжээтэй хээ олж байсан. Гэвч ийм бүтэн гарын мөр бунхнаас олдоно гэдэг нь үнэхээр ховор тохиолдол. Би Египетийн эд зүйл дээр ийм бүрэн бүтэн гарын мөр үлдсэнийг урьд нь хэзээ ч харж байгаагүй” гэж тэр BBC-д ярьжээ.
“Үхэгсдийн сууц” нэртэй уг шавар эдлэл нь аравдугаар сарын 3-наас эхлэн Фицвиллиам музейн “Эртний Египетэд бүтсэн зүйлс” нэртэй үзэсгэлэнд тавигдах юм. Энэхүү үзэсгэлэнд эртний Египетийн урлаг, гар урлалын бүтээлүүд, тэдгээрийг хийсэн хүмүүс болон тэдний хэрэглэж байсан технологи, арга барилыг танилцуулах юм.
