Улсын Дуурь, Бүжгийн Эрдмийн Театр (УДБЭТ)-ын 63 дахь тоглолтын улирлын нээлтийн үйл ажиллагааныхаа талаар өнөөдөр /2025.07.30/ мэдээлэл өглөө.
УДБЭТ нь 9-12 дугаар сар хүртэл нийт найман уран бүтээлийг дотоодын болон гадаадын уран бүтээлчидтэй хамтран тоглохоор зэхээд байгаа юм байна.
Түүнчлэн урлагийг олон нийтэд хүртээмжтэй байлгах зорилгоор анх удаа дуурь, балет үзэх гэж буй хүмүүст зориулж ирэх сарын 1-нээс арванхоёрдугаар сар хүртэл тоглогдох бүх тоглолтын тасалбараа наймдугаар сарын 1-нээс есдүгээр сарын 1-ний өдөр хүртэл 50 хувь хөнгөлөлттэй үнээр зарахаар болсон байна. Энэ нь үндэсний болон дэлхийн театрын урлагийг үзэж сонирхоход маш хямд үнэ юм. Түүнчлэн театр ердөө 500 суудалтай учир эрт худалдаж авахыг зөвлөв.
63 дахь улирлын тоглолтыг сонгодог урлагийн үндэс суурь болсон симфони найрал хөгжмийн бүтээлүүдэд төвлөрсөн “Orchestra Night” тоглолтоор эхлүүлэх аж. Энэхүү тоглолт нь театрын уран бүтээлийн гол тулгуур болсон хөгжимчдийн оролцоог онцлон, симфони найрал хөгжмийн уран сайхны илэрхийлэл, хөгжим дэх утга зохиол, мэдрэмж, өрнөл, дотоод сэтгэлийн хүчийг тайзнаа бүрэн хүргэх зорилготой юм байна.
Дуурь, балетын бүтээлүүдийн ар талд үргэлж оршдог чухал суурь давхарга болох найрал хөгжмийг энэ удаа гол цөмд авч, цэвэр хөгжимд суурилсан үзүүлбэрээр шинэ улирлыг эхлүүлэх нь тус театрын уран бүтээлийн нэгэн онцлог шийдэл юм гэв.
