Анх 2015 онд үзэгчдийн хүртээл болж, олон улсын хэмжээнд томоохон амжилт олсон Холливүүдийн “The Intern” киноны Солонгос хувилбар хийгдэхээр болсон билээ. Киноны эх хувилбарын гол дүрүүдийг Роберт Де Ниро болон Энн Хэтэуэй нар бүтээсэн ба үйл явдалд 30-аад насны амжилттай яваа гүйцэтгэх захирал бүсгүй болон 70 настай дадлагажигч хоёрын хооронд үүсэх халуун дулаан, хөгжилтэй, ухаарал төрүүлэм түүхийг өгүүлдэг.
Тэгвэл уг бүтээлийн Солонгос хувилбарт жүжигчин Чой Мин Шиг болон Хан Су Хи нар тоглохоор болсон талаар БНСУ-ын Кино урлагийн зөвлөл албан ёсоор мэдэгджээ.
Тодруулбал “Oldboy”, “I Saw The Devil”, “Exhuma” зэрэг дэлгэцийн уран бүтээлүүдээрээ танигдсан Өмнөд Солонгосын домогт жүжигчин Чой Мин Шиг энэхүү кинонд амьдралын баялаг туршлагатай, намуухан зан төрхөөрөө эргэн тойрныхондоо урам зориг өгдөг ахмад дадлагажигчийн дүрийг бүтээнэ. Харин “My Name, Gyeongseong Creature” цувралын од Хан Су Хи технологийн салбарт өөрийн хүчээр амжилтад хүрсэн, шийдэмгий, ухаалаг бүсгүйн дүрд хувирах юм.
Киноны зураг авалт ирэх есдүгээр сард эхлэх бөгөөд 2026 онд үзэгчдийн хүртээл болохоор товлогдоод байна.
