Механик зөөгчөөс эхлээд Альберт Эйнштейний дүртэй буюу хүний хуулбар гээд төрөл бүрийн робот зардаг шинэ худалдааны төвийг Бээжинд нээжээ. “Robot Mall” дэлгүүрт 100 гаруй төрлийн бүтээгдэхүүн худалдаалагдах бөгөөд энэ нь тус улсад анхдагчдын нэг болж байгаа юм.
Энэ нь яг л автомашины дилерийн төв шиг буюу борлуулалт, сэлбэг, засвар үйлчилгээ зэрэг иж бүрэн үйлчилгээг санал болгодог. Хятад улс эдийн засгийн өсөлт саарч, хүн ам хөгширч буй зэрэг сорилтуудыг даван туулахын тулд робот техник болон хиймэл оюун ухааны салбарт ихээхэн хөрөнгө оруулсаар байна.
“Роботуудыг мянга мянган өрхөд нэвтрүүлэхийн тулд зөвхөн робот үйлдвэрлэгч компаниудад найдах хангалтгүй” гэж дэлгүүрийн захирал Ван Ифань Ройтерст ярьжээ.
Худалдаалагдаж буй роботуудын үнэ 2,000 юань (278 ам.доллар)-аас эхлээд хэдэн сая юань хүртэл байна. Зочид нохой хэлбэртэй робот, шатар тоглодог робот зэрэг олон төрлийн роботтой үзүүлэнгийн хэсэгт харилцах боломжтой гэж зохион байгуулагчид мэдээлжээ.
“Robot Mall” нь мөн нэрийн ресторантай залгаа байрлах бөгөөд зочдод робот зөөгч үйлчилж, хоолыг мөн робот тогооч нар хийдэг байна. Хятад улс сүүлийн жилүүдэд роботын салбарыг тэргүүлэх чиглэл болгон хөгжүүлж байгаа бөгөөд өнгөрсөн жил гэхэд л татаасны хэмжээ 20 тэрбум ам.доллар давжээ.
Түүнчлэн Хятадын засгийн газар хиймэл оюун ухаан, роботын стартап компаниудад зориулж 1 их наяд юанийн сан байгуулахаар төлөвлөж байна. Хятадын төрийн хэвлэл мэдээллийн хэрэгслүүдийн мэдээлснээр, энэ жилийн арга хэмжээнд дотоод, гадаадын 200 гаруй роботын компани оролцож, 1,500 гаруй үзвэр дэлгэнэ.
Мөн Бээжин энэ наймдугаар сарын 14–17-нд анх удаа болох Дэлхийн хүн дүрст роботын наадмыг зохион байгуулахаар бэлтгэж байгаа ба 20 гаруй орны баг хөнгөн атлетик, бүжиг, хөл бөмбөг зэрэг төрөлд өрсөлдөнө.
