Скейт соёлын салшгүй нэг хэсэг болсон “Vans” брэнд дуучин SZA-тай олон жилийн хамтын ажиллагааны гэрээ байгуулснаа зарлалаа. Тэрээр тус брэндийн шинэ бүтээлч удирдагч буюу Artistic Director-ийн үүргийг гүйцэтгэж, ирээдүйн кампанит ажлууд болон онцгой коллекцуудыг хамтран бүтээх юм.
Энэ талаар SZA “Би олон жилийн турш “Knu Skools” болон “Vans” брэндийн бусад загваруудыг өмсөж ирсэн. “Vans” үргэлж миний үнэт зүйлтэй нийцдэг философитой байсан. Бүтээлч удирдагчийн хувьд миний гол зорилго бол баяр баясгалан, нийгэмлэг, бүтээлч байдал, загварын холбоог “Vans”-ийн загваруудаар дамжуулан харуулах” хэмээжээ.
“Vans” брэнд нь зөвхөн скейтбордын ертөнцийн бэлгэ тэмдэг төдийгүй хөгжмийн салбарт ч чухал байр суурь эзэлсээр ирсэн билээ. Мөн SZA өмнө нь “Crocs” брэндтэй хамтран гоёмсог загваруудыг гаргаж байсан туршлагатай. Ийнхүү энэ удаагийн тэдний хамтын ажиллагаа нь Vans-ийн чөлөөт, залуу сэтгэлгээ SZA-гийн өвөрмөц урлагийн ертөнцтэй огтлолцож, улмаар “Off the Wall”-ийн шинэ бүлэг эхэлж байна.
