Соёл, спорт, аялал жуулчлал, залуучуудын яам, Засгийн газрын хэрэгжүүлэгч агентлаг Соёл, урлагийн газар Монгол Улсын соёлын биет бус өвийн олон төрөл зүйл, угсаатны бүлгийн онцлогийг таниулан сурталчлах “Нүүдэлчин” дэлхийн соёлын фестивалийг дөрөв дэх жилдээ энэ долоо хоногт Налайх дүүргийн нутаг дахь “Тайж хайрхан” уулын бэлд зохион байгуулна.
Наадмын үеэр Монгол Улсад анх удаа Морьт харвааны 17 дахь удаагийн Дэлхийн аварга шалгаруулах тэмцээн наймдугаар сарын 21, 22, 23-ны өдрүүдэд болох гэж байна. Дэлхийн 30 гаруй орны шилдэг харваачдыг нэг дор нэгтгэх төдийгүй Монголын уламжлалт харвааны “Бөмбөг намнаа” төрлийг дэлхийн аваргын албан ёсны төрөлд багтааснаар түүхэн ач холбогдолтой болж байгаа билээ. Энэ нь үндэсний соёл, спортын өвөрмөц уламжлалыг олон улсад сурталчлах, залуу үеийн сонирхлыг татах стратегийн чухал алхам болж байна.
Монгол Улсыг төлөөлөн улсын аваргаар шалгарсан, дэлхийн чансаанд эрэмбэлэгддэг, өндөр түвшний 15 шилдэг харваач оролцох эрхээ авлаа. Мөн олон улсын зэрэглэлтэй шүүгчид, дасгалжуулагчид, Дэлхийн морьт харвааны холбооны удирдлагууд, ЮНЕСКО-ийн Дэлхийн тулааны урлагийн байнгын хорооны дэд ерөнхийлөгч зэрэг хүндэт зочид, төлөөлөгчид оролцохоор болжээ.
Наадмын эхний өдөр буюу наймдугаар сарын 21-д морь сонголт, олон улсын шүүгчдийн сургалт, техникийн зөвлөлийн хурал явагдана. Наадмын хоёр дахь өдөр буюу наймдугаар сарын 22-д дараалсан буудлага /serial shot/, кабак /qabag/ төрлийн тэмцээн болж, шилдгүүд тодорно. Харин наадмын сүүлийн өдөр буюу наймдугаар сарын 23-д масахи /Masahee/, бөмбөг намнаа тэмцээнүүдийн дэлхийн аваргууд тодорч хаалтаа хийнэ.
