Өмнөд Солонгосын алдарт “Blackpink” хамтлагийн гишүүн Rosé “Puma” брэндтэй хамтран гаргасан анхны коллекцоо танилцууллаа. Тэрбээр 2024 онд “Puma” брэндийн соёлыг сурталчлах олон улсын элч төлөөлөгчөөр ажиллаж эхэлсэн ба ийнхүү өөрийн бүтээлч чанар, өвөрмөц хэв маягийг шингээсэн “PUMA x ROSÉ” нэртэй шинэ цуглуулгаа албан ёсоор толилуулж байна.
Rosé-гийн хэв маягийг бүрэн илэрхийлэх энэхүү монохром цуглуулгад oversize загваруудыг эмэгтэйлэг деталь, нарийн оёдол, мөн Rosie гэсэн өвөрмөц бичвэрээр баяжуулжээ. Онцлох загваруудын дунд балетын хэв маягтай Speedcat Ballet, мөн илүү загварлаг мэдрэмж өгөх Speedcat OG Premium зэрэг багтжээ. Мөн шинэхэн цуглуулгынхаа талаар Rosé “Энэхүү цуглуулгад багтсан бүх загвар хүнийг өөрийн хамгийн үнэн, хамгийн зоримог дүрээрээ алхахад нь хүч өгөөсэй гэж хүссэн” хэмээн онцолсон байна.
“PUMA x ROSÉ” цуглуулга нь наймдугаар сарын 28-наас эхлэн “Puma”-гийн албан ёсны вэбсайтаар худалдаалагдах юм.
