Америкийн алдарт дуучин Ариана Гранде 2026 онд хийх аялан тоглолтынхоо хуваарийг пүрэв гарагт зарлажээ. Энэ нь сүүлийн долоон жилийн хугацаанд түүний хийж буй анхны аялан тоглолт болох юм.
Тэрбээр “Instagram” хуудсандаа “дараа жил уулзацгаая” хэмээн бичээд “The Eternal Sunshine” нэртэй аялан тоглолтынхоо хуваарийг нийтэлжээ. Нийт 27 хоног үргэлжлэх тоглолт 2026 оны зургаадугаар сарын 6-нд Калифорни муж улсын Окленд хотоос эхэлж, Лос-Анжелес, Бруклин, Бостон, Лондон зэрэг хотуудад үргэлжилнэ.
Дуучин бүсгүй энэхүү аялан тоглолтоо өнгөрсөн онд гаргасан “The Eternal Sunshine” хэмээх долоо дахь цомгийнхоо нэрээр нэрлэжээ. Уг цомогт “yes, and?”, “we can’t be friends (wait for your love)” зэрэг хит дуунууд нь багтсан юм.
А.Гранде саяхан “The Eternal Sunshine” цомгийнхоо 2025 оны өргөтгөсөн хэлбэрийн дахин хэвлэлтэд зориулан Америкийн найруулагч Кристиан Бреслауэрын найруулсан “Eternal Sunshine” нэртэй богино хэмжээний киног гаргажээ. Мөн түүний гол дүрд нь тоглосон “Wicked: For Good” уран сайхны кино энэ оны 11 дүгээр сарын 21-нд нээлтээ хийнэ.
