Монголчуудын уугуул аж ахуй, нүүдэлчдийн өв, соёл, зан заншил, уламжлалыг судлах, түгээн дэлгэрүүлэх, хамгаалах, цаашид Монгол Улсыг нүүдлийн соёл иргэншлийн төв, тэргүүлэх улс болгон хөгжүүлэх зорилготой “Нүүдэлчин” дэлхийн соёлын фестиваль өнөө жил өнгөрсөн наймдугаар сарын 22-24-нд дөрөв дэх жилдээ Налайх дүүрэгт байх Тайж хайрхан уулын бэлд зохион байгуулагдсан.
Тэгвэл өнөө жилийн “Нүүдэлчин” дэлхийн соёлын фестивалийг гурван өдрийн хугацаанд давхардсан тоогоор 260,000 гаруй үзэгч хүрэлцэн очиж үзжээ. Энэ нь өнгөрсөн жилийн 169,000 үзэгчтэй харьцуулахад 53 хувиар өссөн үзүүлэлт юм.
Түүнчлэн Монголын 22 аймаг, нийслэлээс ирсэн 1,092 өвлөн уламжлагч өөрийн язгуур соёлоо дэлхий дахинд сурталчилсан байна.
27 улсын 280 гаруй төлөөлөгч, тамирчин, зочид оролцож, Морьт харвааны ДАШТ, олон улсын форум, урлагийн тоглолтуудаар дамжуулан соёлын гүүрийг бататгав.
“Нүүдэлчин зоог” аялал жуулчлалын хоолны гудамжнаас нийтдээ 1.8 тэрбум төгрөгийн орлого бүртгэгдсэн нь энэ жилийн онцлох амжилт байсан аж.
Мөн албан ёсны сошиал сувгаар нийт 620,000 гаруй хэрэглэгчид мэдээлэл хүрсэн нь фестивалийн цахим орчин дахь хүрээг улам өргөтгөжээ.
“Нүүдэлчин” бол зөвхөн соёлын наадам бус — Монголын өв, уламжлалыг дэлхийтэй холбосон гүүр юм.
