Венецийн кино наадмын дээд шагнал болох “Алтан арслан”-г Америкийн найруулагч Жим Жармуш бямба гараг /2025.09.06/-т хүртжээ. Өдгөө 72 настай тэрбээр шагналаа гардан авахдаа “бидний бүтээсэн намуухан киног үнэлсэнд талархаж байна” хэмээн хэллээ.
Ж.Жармуш найруулж, Австралийн жүжигчин Кейт Бланшетт, Америкийн жүжигчид болох Адам Драйвер, Том Уэйтс нарын тоглосон “Father Mother Sister Brother” кино нь насанд хүрсэн хүүхдүүд болон тэдний эцэг эхийн хоорондын ээдрээтэй харилцааг харуулсан инээдэм, драм жанрыг хослуулсан антологи бүтээл ажээ.
“Father Mother Sister Brother” нь Венецийн кино наадамд өрсөлдсөн Ж.Жармушийн анхны кино юм. Өмнө нь “Nomadland”, “Joker” зэрэг “Алтан арслан” шагнал хүртсэн хэд хэдэн бүтээл “Оскар”-ын шагналуудыг хүртэж байв.
Харин Америкийн найруулагч Александр Пэйнээр ахлуулсан шүүгчид Хятадын найруулагч Цай Шанжуны найруулсан “The Sun Rises on Us All” кинонд тоглосон жүжигчин Шин Жилейг “Шилдэг эмэгтэй жүжигчин”-ээр тодруулсан байна. Өдгөө 39 настай жүжигчин бүсгүй гомдол, уучлал зэрэг сэдвийг хөндөн харуулсан уг киноны гол дүрийг бүтээжээ.
Харин Италийн жүжигчин Тони Сервилло найруулагч Паоло Соррентиногийн “La Grazia” кинонд улс төрийн замналаа дуусгах дөхөж буй ерөнхийлөгчийг дүрийг бүтээснээр “Шилдэг эрэгтэй жүжигчин”-ий шагналыг хүртсэн байна. Хэд хэдэн шагнал хүртэгчид Газын зурвас дахь нөхцөл байдлын талаар дурдсаны дотор Венецийн наадамд тогтмол оролцдог Т.Сервилло байлаа. Тэрбээр усан онгоцоор Газыг зорьж буй идэвхтнүүдээр “бахархаж” байгаагаа илэрхийлжээ.
