Францын найруулагч, зохиолч Алис Винокурын “Couture” хэмээх бүтээл нэрээсээ эхлээд л үзэгчдийн анхаарлыг татаж буй. Нээлтээ хийгээд тун удаагүй байгаа /2025.09.07/ эл киноны үйл явдал Парисын загварын долоо хоногийн үеэр огтлолцох гурван эмэгтэйн хувь тавилангийн тухай өгүүлнэ.
Хөхний хорт хавдар туссан кино найруулагч Максин Уокер, томоохон загварын ордны шоунуудад оролцож байсан, шинэхэн модель Ада болон тайзны ард үргэлж нуугдах, хэзээ ч үнэлэгддэггүй нүүр хувиргагч бүсгүй нарыг юу хүлээж байгаа бол?
Киноны хувцасны дизайнераар Францын үндэсний кино шагнал болох “César”-д нэр дэвшиж байсан Паскалин Шаванн ажиллаж, дээд зэрэглэлийн загварын ертөнцийн тансаг байдлыг эгэл амьдралын саарал өдрүүдтэй эсрэгцүүлэн, контраст дээр тоглолт хийж, киноны уур амьсгалд онцгой өнгө төрх нэмсэн байна.
Мөн уг киноны албан ёсны түншээр “Chanel” загварын ордон ажиллаж, зураг авалтад зориулан архивын ховор бүтээлүүдээ гаргаж, мөн тусгайлан хэд хэдэн онцгой загваруудыг урлажээ.
