Италийн аялал жуулчлалын төв Венец хотын бэлгэдэл болсон алдарт арслангийн баримал анх Хятадад бүтээсэн дурсгал болохыг судлаачид тогтоожээ.
Тус хотын Гэгээн Маркийн талбайд оршдог Пиацетта баганын оройд жигүүртэй арслангийн хүрэл баримал байдаг.
Италийн Падуа их сургуулийн судлаачид арслангийн металл бүтцээс дээж авч шинжлээд үүнд ашигласан хүрлийн хайлшийн зэс нь Хятадын Хөх мөрнөөс гаралтайг тогтоосноо саяхан Antique сэтгүүлд нийтлүүлжээ.
4 метр урт, 2.2 метр өндөр энэ баримлыг өмнө нь Сири, эсвэл Анатолид (Турк) бүтээсэн гэж үздэг байсан байна.
Гэхдээ баримлын хэв маяг яагаад ийм өвөрмөц болохыг тайлбарлаж чаддаггүй байжээ.
Баримлыг арван гуравдугаар зуунд Гэгээн Маркийн талбайд анх босгож байсан гэнэ. Гэхдээ уг баримлаас хоншоорын хэлбэр, эвэр зэргийг арилгаж зассан ул мөр байгааг илрүүлсэн байна.
Хэрвээ эдгээр арилгасан элементүүдийг буцаан сэргээвэл нийтийн тооллын 618-907 онуудад Хятадад оршин тогтнож байсан Тан улсын үеийн бүтээлүүдтэй тун төстэй харагдахаар байжээ.
“Марко Пологийн аав, авга ах хоёр анхны аяллынхаа үеэр Хубилай хааны ордонд дөрвөн жил амьдрахдаа энэ баримлыг Венецид авчрахад гол үүрэг гүйцэтгэсэн байх магадлалтай” гэж судалгааны тайланд бичсэн байна.
Дээр дурдагдсан аялал 1264-1268 оны хооронд болсон юм.
Уг баримал анх Тан гүрний үеийн бунхны хамгаалагч арслан “жэнмушоу” гэгч урлагийн бүтээл байсан гэх таамгийг судлаачид дэвшүүлжээ.
“Үүнийг Венец хүртэл тээвэрлэх болсон шалтгаан, аяллын талаар бичигдэж үлдсэн баримт байхгүй байгаа нь тайлбарыг нээлттэй хэвээр үлдээж байна. Арсланг байрлуулсан нь тухайн үедээ улс төрийн хүч нөлөөгөө харуулах зорилготой байсан бол “өнөөдөр энэ нь дундад зууны соёл иргэншил хоорондын гайхалтай хэлхээ холбоог харуулж байна” гэж судлаачид тайландаа бичсэн байна.
